Дьокуускайга муус оҥоһук күрэҕэ буола турар

Күрэх кыттыылаахтара үөрүйэхтик туттан мууһу эрбээбитинэн бараллар. Бу аан дойдуга  мууһу кыһар оҕолор соҕотох күрэстэрэ. Быйыл эдэр маастардар  норуот сомоҕолоһуутугар  сыһыаннаах араас оҥоһуктары чочуйан таһаарыахтара.

Халлааммыт хойуу хаардаах, тыаллаах. Маннык күн-дьыл муус кыһыытыгар улахан мэһэйэ суох эрээри, бытархай чаастары чочуйууга киһи хараҕа сылайыан сөп диэн маастардар үллэстэллэр. Хаҥалас улууһун Хачыкаат оҕолоро быйыл бастакыларын холоноллор. Саҕалыах иннинэ өссө төгүл үнүстүрүмүөннэрин сыымайдыыллар, эскизтарын үөрэтэллэр. 

Альберт Саввинов, Хаҥалас улууһун Хачыкаат орто оскуолатын үөрэнээччитэ: "Биһиги үлэбит “Мечты сбываются, где в них верят” диэн. Экиһынан көрөн үлэлээн саҕалыахпыт". 

Талааннаах ыччат Саха сирин улуустарыттан, Арассыыйа араас регионнарыттан уонна Кытайтан кэлбит. Харбин куорат хамаандата мууска тута уруһуйдаан, кыспытынан, эрбээбитинэн барар. Кинилэр сүрэҕи кууһан турар омугуттан тутулуга суох оҕоҕо муҥура суох тапталы ойуулаан таһаарыахтара.

Чжэн Цзиньянь, Харбин оскуолатын учуутала: "Мин 2023 сыллаахха Дьокуускайга кэлэ сылдьыбытым. Бэйэм муус оҥоһук күрэҕэр кыттыбытым. Онно сылдьан бу оҕо күрэҕин дьүүллүүр сүбэтин кытта билсибитим. Кинилэртэн быйылгы күрэҕи истэммит, бу кытта кэллибит".

Күрэх быйыл 7 төгүлүн ыытыллар. Бу нарын кыргыттар ааспыт сыл кыайыылаахтара, онон күрэхтэһээччилэр бары кинилэри куоһарарга кыһаллаллар. Саха гимназия үөрнээччилэрэ быйыл эмиэ бастыыр иһин дьулуурдаах кэлбиттэр. 

Виталина Николаева, Саха гимназия үөрэнээччитэ: "Былырыын муус оҥоһукка бастаабыппыт. Быйыл мууска икки күнү биэрэллэр, оттон хаарга балтараа". 

Мууһу түмүктээбит кэннэ аны хаар оҥоһукка түһүнүөхтэрэ. Манна чопчу ирдэбил суох. Онон оҕолор тугу таптаабыттарын кыһан таһаарыахтара. Инники 3-4 күҥҥэ муус паарка талааннаах ыччат түһүлгэтигэр кубулуйуо. Манна араас сир оҕолоро билсиэхтэрэ, уопут атастаһыахтара, доҕордоһуохтара. 

Николай Птицын, Дьокуускайдааҕы оҕо ойуулуур-дьүһүннүүр оскуолатын дириэктэрэ: "Сүүмэрдээһин түмүгүнэн 15 хамаанда кытта сылдьар. Бастакы норуоттар иикк ардыларынааҕы таһымнаах буолла.  Кытайтан биир хамаанда, Новосибирскайтан, Хабароскайтан, Красноярск куораттартан бааллар уонна Саха сирин хамаандалара".  

Куонкурус түмүгэ нэдиэлэ бүтүүтэ тахсыа. Онон уран үлэ хардыытын ким баҕалаах кэлэн көрүөн сөп. Оҕолор оҥорбут оҥоһуктара мантан саас муус куораты киэргэтиэхтэрэ.