Арассыыйа үрдүнэн "Сэрэниҥ, чараас муус" аахсыйа 4 түһүмэҕэ үлэлээн саҕалаата

Иниспиэктэрдэр муус парка салалтатын кытта сэрэтэр үлэни ыыталлар. Өссө төгүл тоһоҕолоон туран сэрэхтээх буолуу ирдэбиллэрин санаталлар. Билигин эбэ мууһа миэтэрэ халыҥнаах. Бу дьон сылдьыытыгар уонна 10 туоннаҕа диэри ыйааһыннаах тиэхиньикэ кииритигэр көҥүллэнэр кээмэй.

Алексей Спиридонов, "Сайдар" паарка салайааччыта: «Куттал суох буолуута барыта көрүллэн сылдьар, экология өттүгэр эмиэ. Ыраастыы, хомуйа сылдьабыт. Муус халыҥа эппиэттиир. Ириэрии саҕаланнаҕына барытын көтүрэн таһаарабыт, бэйэбит кэннэ барытын хомуйабыт».

Сайсары күөлүгэр оҥоһуллубут муус паарка бу ааспыт өрөбүлтэн аһыллан үлэлиир. Тымныы кыаҕын ыһыктыбат. Дьокуускай эмиэ хойуу тумаҥҥа сууланар. Онон рейдэ кэмигэр дьон-сэргэ олох аҕыйах.

Кыһыҥҥы да кэмҥэ күөллэргэ чараас сирдэр баар буолуохтарын сөп диэн иниспиэктэрдэр этэллэр. Онон хас биирдии тоҥон да турар буоллун уу эбийиэгэр үктэнээччи ирдэбили эндэппэккэ билэрэ наадалаах. Бу сыалтан муус маастардарыгар иниспиэктэрдэр сэрэтэр кэпсэтии ыыталлар. Кинилэр Сайсары мууһа быйыл кытаанаҕын, халыҥа миэтэрттэн ордубутун ыйаллар. 

Павел Курбатов, ЫБММ Саха сиринээҕи салалтатын дьоҕус суудуналарга судаарыстыбаннай иниспиэксийэ Дьокуускайдааҕы салаатын судаарыстыбаннай иниспиэктэрэ: «Мы проводим совместное патрулирование со всеми ведомствами. Сами выезжаем на озера, на ледовые переправы, объясняем людям, как правильно себя вести на водных объектах. Проводим профилактические беседы с населением, раздаем тематические листовки».

Дьон маассабай сырыыта сааскы аралдьытар пааркаларга халлаан арыый сымнаатаҕына кулун тутартан саҕаланыа. Маныаха иниспиэктэрдэр миэстэтигэр эрэ сэрэтии үлэтинэн муҥурдаммакка оскуолаларга, уһуйааннарга өйдөтөр лекциялары ыыталлар.