Тырааныспар полицията бүгүн идэлээх күнүн бэлиэтиир
Икки симиэнэнэн, төгүрүк суукка. Дьуһуурустубаҕа тахсыах иннинэ хас биирдиилэрин докумуонун, саадын-саадаҕын сыныйан бэрэбиэркэлииллэр. Бу үлэһиттэр аны киэһээҥҥи диэри Дьокуускай аэропордугар бэрээдэги көрүөхтэрэ. Пассажирдар, көрсөөччүлэр-атаарааччылар куттала суох буолуулара кинилэртэн тулуктаах.
Николай Заровняев, ИДьМ тырааныспарка Хотугулуу-Илиҥҥи салалтатын кэтээн көрөр сулууспатын хамандыыра: «Сулууспа сүрүн үлэтэ аэропорка бэрээдэк көрөөһүн уонна дьоннорго көмөлөһөбүт».
Транспорт полицията бүгүн идэлээх күнүн бэлиэтиир. Үгүс сотрудник бу күнү үлэтигэр көрсөр. Төһө да суолталаах дата буоллар, нэһилиэнньэ куттала суох буолуута инники күөҥҥэ. Күн бүгүн биэдэмистибэ Саха сирин уонна Чукотканы хабар. Тыһыынчанан килэмиэтир тимир суола, 6 өрүс порда уонна 30 тахса салгын киэнэ. Уһун сылларга дьуһуурунай чааһы салайар Илья Алексеев этэринэн, аэропортка буруйу кэһии ахсаана аҕыйах, бу туһааннаах бэдэмистибэ үлэтин түмүгэ.
Илья Алексеев, ИДьМ тырааныспарка Хотугулуу-Илиҥҥи салалтатын дьуһуурунай чааһын салайааччы: «Арааһынай буолар, ону дьуһуурунай чаас үлэһиттэрэ сайабылыанньа ылан, холобур сокуон кэһиитэ буолбут буоллаҕына оперативнай бөлөҕү ыытар».
Ааспыт сыл көрдөрүүтүн ылан көрөр эбит буоллахха, былырыын барыта 7000 тахса административнай боротокуол оҥоһуллубут. Ону сэргэ 300 тахса буруйу кэһии бэлиэтэммит. Транспорт полициятыгар дьыаланы арыйыы 100 бырыһыаҥҥа тэҥнэһэр. Холобур, миграционнай хайысхалаҕа аэропортка күүстээх үлэ ыытыллар.
Роман Собанин, ИДьМ тырааныспарка Хотугулуу-Илиҥҥи салалтатын уопсастыба бэрээдэгин көрөр анал салаа иниспиэктэрэ: «За 2025 год было составлено 624 протокола по сфере миграции. Основные нарушения у них являются: незаконное прибытие на территорию РФ, нарушение миграционного пребывания, также по документам бывает прописка просроченная».
Маны сэргэ улахан күүһү тимир суолунан наркотигы таһыыны уонна көҥүлэ суох көмүһү, сэлии муоһун илдьиини тутуу транспорт полициятын биир сүрүн үлэтэ. Бу хайысхаҕа бэйэтин холонон көрүөн баҕалаахтары үлэҕэ ыҥыраллар.