Амма улууһун киинигэр саҥа доруобуйа харыстабылын уораҕайа үлэлиир

Киин куоракка киирбэккэ тутатына уустук диагнозтары миэстэтигэр быһаарыы, өр кэтэһиитэ -манааһыыта суох эмтэнээһин, көрдөрүнүү - маннык усулуобуйа Амма киинигэр баар буолла. Өр сыл ыра оҥостубут баҕа санаа олоххо киирэн Аммаларга доруобуйа харыстабылын уораҕайа аанын тэлэччи аспыта.

Бу иннинэ эмчиттэр уустук соҕус усулуобуйаҕа үлэлии олорбут эбит буоллахтарына, билигин киэҥ сырдык-ыраас, сылаас эбийиэккэ үлэ күргүөмэ барар. 3 этээс тухары аныгы ирдэбилгэ толору эппиэтиир мал-сал, оборуудабанньа турда. Манна холобура, ис-үөс, куртах ыарыылаахтары көрөр аппараат үлэһиттэргэ да, ыарыһахтарга да олоҕу чэпчэттэ.

Михаил Архипов, Амма улууһун кылаабынай бырааһа: «Эндоскопическай стойка диэн буолар. Кини куртаҕы көрөр уонна маннык колоноскоп аппарат баар. Көрбүт дьоннору хаартыскаҕа түһэрэбин уонна тутатына дааннайдары манна бэйэтигэр киллэрэбин. Билигин “Архимедка” холбуохпут оччоҕо Арассыыйа үрдүнэн ханнык баҕар быраас көрүөн сөп».

Бу курдук хас салаа ахсын саҥа оборуудабанньалар тураннар, чахчы киин куоракка тэҥнээх балыыһаҕа кубулуйда диэн үлэһиттэр үөрүүлэрин үүллэстэллэр. Онтон манна саамай астыммыт дьон биллэн туран олохтоох нэһилиэнньэ.

Дария Васильева, Амма улууһун олохтооҕо: «Мин укол ылаары кэлэн турабын. Балыыһабыт сүрдээх сырдык, киэҥ-куоҥ, сылаас. Үлэһиттэр да абыраныахтара этэ».

Үөһээ аллараа түспэт гына кэлбит дьон көрдөрөллөрүгэр судургу буоллун диэн бастакы, иккис этээскэ исписэлиистэр олохсуйдулар.

Саргылаана Сабарайкина, Амматааҕы поликлиника сэбиэдиссэйэ: «Сүрүн исписэлиистэрбит олороллор: стоматологтар, эндокринолог, невролог, профилактика кабинета, окулист, терапевтар. Үһүс этээскэ лабаратория уонна женскай консультация».

Национальнай бырайыактар олоххо киирэллэр. 20 сыл кэтэһиилээх балыыһа Амма киинин киэркэтэн үгүс киһи доруобуйатын тупсаырыаҕа.