Бу нэдиэлэҕэ арҕааттан хас даҕаны сис былыт хаары, тыалы аҕалара күүтүллэр

Родион Карташов - уопуттаах тиэргэн ыраастааччы. Номнуо 5 сылын Сайсары уокуругар муниципальнай дворнигынан үлэлии-хамсыы сылдьар. Билигин хаар түһэ турар буолан үлэлэрэ эбиллэр. Соторутааҕыта хомуйбутун тута хаарынан бүрүллэн иһэр. Ыраастыыр сирбит иэнэ киэҥ диэн Родион Александрович кэпсиир.

Родион Карташов, Сайсары уокуругун үлэһитэ: «Бүлүү трассатыттан Сэргэлээххэ дылы барыта биһиэнэ. Бөх хомуйабыт, тротуар ыраастыыбыт, хаар күрдьэбит. Остановкалары, пешеходкалары муустарын ыраастыыбыт».

Маннык хас биирдии уокурук дворниктара бэйэлэрин территорияларын көрөллөр-истэллэр, ыраастыыллар. Салгыы бу Сэбиэскэй сойуус Геройа Владимир Лонгинов аатынан сквер кэннэ сатыы дьон сылдьар сиригэр тиийэн эмиэ хаары кытта үлэлииллэр.

Константин Обутов, Сайсары уокуругун үлэһитэ: «Бастаан хонтуораҕа кэлэн бэлиэтэнэн баран, ким ханнык маршрутунан барарын быһаараллар. Былааннаан үллэрэллэр, эбэтэр суһал ыҥырыы баар буоллаҕына онно барабыт».

Ааспыт нэдиэлэ бүтүүтүттэн Саха сирин кэккэ улуустарыгар бэрт сылыйа сырытта. Ол курдук, Ленскэйгэ, Өлүөхүмэҕэ 7 кыраадыс буола сырытта. Оттон хотугулуу-илин олунньу 16 күнүттэн биллэрдик тымныйда.

Бу нэдиэлэҕэ арҕааттан хас даҕаны сис былыт хаары, тыалы аҕалара күүтүллэр.    

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаатын салайааччыта: «Киин куоракка олунньу 17 күнүгэр сөҥүүтэ суох, түүҥҥү температура -33,-35. Күнүс -27,-29 кыраадыс. Олунньу 18 күнүгэр күнүһүн кыралаан хаардыа, түүнүн туманнаах. Түүҥҥү температура -40,-42. Күнүс -28,-30 кыраадыс тымныы».

Таһырда сылыйан дьон-сэргэ сибиэһэй салгыҥҥа тахсара элбээтэ. Оҕо-аймах сырылыыр, хатааһылыыр сирдэргэ талаһар.

Игорь Сыроватский, Дьокуускай олохтооҕо: «Биһи дьиэбит таһыгар былаһааккаҕа сынньанабыт. Бириэмэ көһүннэҕинэ маннык курдук сылдьабыт».

Мантан кэнники саас биллэ чугаһаан, күн уһаан хас биирдии киһи сүргэтин көтөҕүө турдаҕа.