Дьокуускайга буруйуу оҥоруу көрдөрүүтэ намтыыр

Иһитиннэрии киирэн Рогвардия байыастара ыйыллыбыт аадырыска суһаллык айанныыллар. Аҕыйах мүнүүтэнэн этиллибит сиргэ айаннатан тиийэн, 3 этээскэ уорбаланнааччы куотан эрэрин тохтотоллор. Бигэргэтиллибит ирдэбилинэн тутаннар, уорууга уорбаланар киһини массыынаҕа илдьэллэр.

Халтурина уулууссаҕа турар дьиэ аана аһаҕас турарын билэн, уорбаланнааччы халыыр соруктаах киирбитин. Хаһаайыттар Росгвардияны кытары сөбүлэҥ түһэрсэннэр суһал кнопка үлэлээн, прапорщик Егор Карамзин кэллиэгэтин кытары  элэҥнэччи кэлэн буруйу таһааттарбатылар.

Егор Карамзин, Росгвардия федеральнай сулууспатын Саха сиринээҕи управлениятын биэдимистибэ таһынан харабыллыыр салаатын үлэһитэ, полиция прапорщига: "Ааннар уонна түннүктэр сигнализациялара тыаһаата. Тута онно тиийдибит. Уонна онно биир уорбаланааччыны туттубут".

Күннэтэ бу курдук 5-6 иһитиннэрии киирэр. Ол курдук ааспыт сылга 5594 ыҥырыы көрүллүбүтэ диэн тустаах биэдэмистибэ иһитиннэрэр. Маныаха сүрүн үлэ терроры утары ыытыллар.

Николай Канаев, Росгвардия федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын харабылланар тэрилтэлэр хайысхаларын үлэтин тэрийэр салаа иниспиэктэрэ: "Терроризмы утары хамыыһыйаҕа уон үстэ мунньахтаабыппыт. Террортан харыстаныыга кэһии баар 43 эбийиэккэ боротокуол оҥорбуппут".

Маныаха нэһилиэнньэни кытары үлэ күүстээхтик ыытыллар. Биир сүрүн хайысханан киин куорат олохтоохторун сааларын кэтээһин буолар. Анал харайар сиргэ билигин 560 киһи саатын-саадаҕын туттаран турар.

Андрей Кондаков, Росгвардия федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын инженернэй салаатын сүрүннүүр инженерэ: "Саа харайар ячейкаҕа дуогабар түһэрсэллэр. Туора дьон, оҕолор сааны тыыппатыннар диэн манна аҕалан туттраыахтарын сөп".

Манна даҕатан эттэххэ, быйыл Росгвардия тэриллибитэ 10 сыла. Бу кэм устата буруйу туоратыыга, бэрээдэги кэһиини суох оҥорууга үтүмэн үлэ оҥоһулунна.

Владислав Иванов, Росгвардия федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын быстах кэмҥэ салайааччыны солбуйааччы: "10 сыл устата биһиги харабыллыыр эбийиэктэрбитигэр уоруу тахсыбата. Бу Росгвардия биэдэмистибэ таһынан харабыллыыр салаата үрдүк таһымнаахтык үлэлиирин дакаастыыр. Уон сыл иһигэр 30 тыһыынчаттан тахса суһал иһитиннэрии киирдэ".

Росгвардия сулууспата бу хайысхаҕа үлэлиэн баҕарар 18-тан үөһэ саастаах дьону үлэҕэ ыҥырар. Холуобунай дьыалаҕа түбэспэтэх, байыаннай сулууспалаах,  доруобуйатын туруга үчүгэй эр дьону уонна кэрэ аҥаардары  көһүтэр.