Уйулҕа киинэ бааһырбыт байыастарга миэстэтигэр тиийэн көмөнү оҥорор
Анал байыаннай дьайыы кыттыылааҕа, "Хорсун быһыы" иһин мэтээл хаһаайына, гвардия сержана Александр Федоров уйулҕа исписэлиистэригэр куруутун сылдьар. 2024 сыллаахха Новоселовка диэки кимэн киириигэ кини атаҕыгар бааһырыы ылбыта. Онтон сатаан тахсыбакка 17 күн устата окуопаҕа сыппыта.
Александр Фёдоров, анал байыаннай дьайыы кыттыылааҕа, "Хорсун быһыы" иһин мэтээл хаһаайына, гвардия сержана: "Эчэйии кэннэ атаҕым гангрена буолбута. Ол иһин бэйэм быһарга күһэллибитим. Тахсыбытым кэннэ тута психологтар көрсүбүттэрэ. Саамай улахан көмөнү кинилэр оҥороллор".
Байыаннай балаһыанньаҕа тыыннаах хаалыы инникки күөҥҥэ буолан, сержант киһи өр толкуйдуу барбакка өлөр быаттан куотан, бэйэтин атаҕын бэйэтэ быстан тыыннаах хаалбыта. Бу биллэн туран уйулҕаҕа улахан охсуу. Онон кини дойдутугар кэлиэҕиттэн тутатына психологтары кытары үлэлэһэр. Ис туруга көнөн билигин АГАТУ-га устудьуоннуу киирдэ.
Феодосия Фёдорова, Өрөспүүбүлүкэтээҕи уйулҕа киинин кэтээн көрүү уонна коррекция салаатын сэбиэдиссэйэ: "Анал байыаннай дьайыы кыттыылаахтарын кытта 2022 сылтан үлэлиибит. Онно сылдьан кинилэр туруктара уларыйар. Кыайан утуйбат буолаллар, бэйэлэрин буруйданыахтарын сөп, эттэрэ-хааннара эмиэ уларыйар, дьону кытта алтыһалларыгар ыарахаттары эмиэ көрсөллөр. Ол иһин олох үчүгэйдик үлэлэһиэх тустаахпыт".
Билигин Саха сирин уйулҕа исписэлиистэрэ Ростов на Дону куорат госпиталыгар үлэлии сылдьаллар. Манна биһиги исписэлиистэрбит бааһырыы ылбыт саллааттары кытары үлэлэһэллэр. Салгыы дойдуларыгар төнүннэхтэринэ манна эмиэ үлэ салҕанар.
Анатолий Кузьмин, Өрөспүүбүлүкэтээҕи уйулҕа киинин салайааччытын солбуйааччы: "Уйулҕаһыттар биригээдэлэрэ Ростов на Дону куоракка барда. Ол аата биһиги өрөспүүбүлүкэ иһигэр эрэ буолбакка тас өттүгэр эмиэ үлэ ыытабыт. Оннук үлэлээбиппит 3 сыл буолла. Иккилии психолог Ростовка тиийэн байыастары уонна кинилэр дьиэ кэргэттэрин кытта үлэлэһэр".
Уйулҕа киинэ анал байыаннай дьайыы кыттыылаахтарын кытары түүннэри күнүстэри үлэлэһэр. Ким уйулҕа киинигэр хаһан да сылдьа илик 31-91-09 нүөмэргэ эрийэн, суруттарыаххытын сөп.