Ааспыт өрөбүллэргэ 16 суоппар арыгы иһэн баран уруулга олорон тутулунна

Суолга саахал тахсара уҕараабат. Киин куоракка бу өрөбүллэргэ 15 тимир көлө кыттыылаах оһол таҕыста, онно 2 киһи араас таһымнаах эчэйиилэри ыллыллар. Субуота күн суһал көмө массыыната уонна сатыы сылдьааччы киһи кыттыылаах быһылаан тахсыбыта.

Жанна Макарова, СӨ ИДьМ суолга куттал суох буолуутун хааччыйар иниспиэксийэтин сырдатар-тарҕатар салаатын иниспиэктэрэ: «51 саастаах суһал көмө тимир көлөтүн суоппара 55 саастаах сатыы көҥүллэммэт суолу туоруур сиринэн туораан испит киһини түннэри көппүт. Ол түмүгэр сатыы сылдьар киһини эчэйиилэрдээх балыыһаҕа укпуттар. Бэрэбиэркэ көрдөрбүтүнэн сатыы сылдьааччы аһыы утах иһэн сылдьыбыта биллибит. Ол киэһээ “Тойота Лэндкрузер” массыына суоппара суолтан көппүт».

Кимин куоракка балаһыанньа маннык эбит буоллаҕына Өрөспүүбүлүкэ суолларыгар эмиэ үгүс кэһиилэр бу өрөбүллэргэ тахсыбыттар. Ол курдук, 16 суоппар аһыы утах иһэн баран уруулга олорбуттара билиннэ. Маныаха биир киһи иккистээн тутуллубут. Итиэннэ тимир көлөнү ыытар бырааба суох дьону ГАИ инспектордара тохтотон, билигин бу дьыаланан административнай дьыалалар көбөтүлүннүлэр.

Филипп Тырылгин, СӨ ИДьМ суолга куттал суох буолуутун хааччыйар иниспиэксийэтин сырдатар-тарҕатар салаатын иниспиэктэрэ: «Өрөспүүбүлүкэ үрдүнэн 33 массыына саахала тахсыбыт, 4 киһи эчэйиини ылла, ол түмүгэр 1396 администартивнай дьыала оҥоһулунна. Убаастабыллаах суоппардар уонна сатыы сылдьааччылар, суол быраабылатын кэһимэн, суолга сэрэхтээх, болҕомтолоох буоларгытын умнуман».

Маныаха билигин күн-дьыл уларыйар кэмигэр, суолга халтараантан сэрэхтээх буоларга ГАИ иниспиэктэрдэрэ ыҥыраллар. Манна саамай сүрүнэ - тимир көлө икки ардыларын тутуһуу буолар.

Жанна Макарова, СӨ ИДьМ суолга куттал суох буолуутун хааччыйар иниспиэксийэтин сырдатар-тарҕатар салаатын иниспиэктэрэ: «Күн-дьыл уларыйан суоппардар болҕомтолоох буолун диэн ыҥырабыт. Суол быһа охсуллар сирдэригэр хайаан да болҕомтолоох буолун».

Сатыы сылдьааччыларга эмиэ сэрэхтээх буоларга ыҥыраллар. Билигин суолга халтараан буолан, массыына тохтуур кээмэйэ уһаан биэрэр. Тутатына тохтуур билиҥҥи кэмҥэ уустуктардаах.