Саха сиригэр баһаары утары эрэһиим олохтонно

Тутатына бастакы кэһии. Бэрт соторутааҕыта саҥа аанын тэлэччи ааспыт элбэх кыбартыыралаах дьиэҕэ баһаарынай муннукка туох да суоҕа билиннэ. Ыксаллаах быһыы-майгы министиэристибэтин иниспиэктэрдэрэ 14 этээс тухары барытын сыныйан көрдүлэр.

Маны кытары тэҥҥэ иниспиэктэрдэр дьиэ олохтоохторун кытары сэрэтэр кэпсэтиини ыытыллар. Саҥа дьиэҕэ хайаан даҕаны АДПИ, баһаар бастакы сөкүүндэтиттэн тыас таһааран биллэрэр тэрили, ыйыырга ыҥырдылар. Салгыы дьиэ көрүдүөрүн, куотар ааннары көрдүлэр.

"Бүгүҥҥү бэрэбиэркэ түмүгүнэн баһаарынай иниспиэктиэрдэр барыта 21 кэһиини буллулар. Салгыы маны туоратыыга үлэ барыаҕа",- Анастасия Добрянцева, корреспондент.

Ол курдук, бу бэрэбиэркэ элбэх кэһии тахса турарын бигэргэттэ. Иниспиэктэрдэр   оннооҕор уот турдаҕына бастакы мүнүүтэҕэ уммуларар тэрил - огнетушитель  суоҕуттан дьиксинниллэр.

Василий Самсонов, Дьокуускайдааҕы баһаар кэтэбилин уонна сэрэтэр үлэ салаатын судаарыстыбаннай иниспиэктэрэ: "Сигнализациялара арахсан турарм эбит, ону таһынан бүөлээх. Бу аата үлэлиир кыаҕа суох дэнэр. Ону таһынан буруону тутар ааннара бүтүннүү аһаҕас тураллар. Ол аата куттала суох сир бу дьиэҕэ суох диэн. Бу кэннэ прокуратураны кытта сүбэлэһэн баран хаттаан улахан бэрэбиэркэ оҥоробут. Ол кэннэ эппиэттээх тэрилтэни административнай миэрэҕэ тардабыт".

Төһө да баһаарынай кэтэбил  исписэлиистэрэ күннэтэ маннык риэйдэбэй-профилактическай үлэ ыытылларын үрдүнэн баһаар  ахсаана үрдүү турар. Ньурба улууһун Ньурбачааныгар 5 киһи өлүүлээх алдьархай таҕыста. 2 киһи билигин улуус киин балыыһатыгар сыталлар. Бу иэдээнинэн  Ил Дархан суһал мунньах ыытта.

Бу күн тутатына Ил Дархан Айсен Николаев ыксаллааах быһыы-майгы бөлөҕүн кытары көрсөн, бу хайысхаҕа үлэни икки бүк күүһүрдэргэ этэн,  өрөспүүбүлүкэ үрдүнэн баһаар ураты эрэһиимин олохтуурга сорудахтаата. Уонна АДПИ-ны сүүс быраһыан туруоруу үлэтин ыытарга уураахтаата.

Дмитрий Садовников, СӨ Бырабыыталыстыба бэрэссэдээтэлин бастакы солбуйааччы: "118 баһаар буолла, хомойуок иһин, улахан уокка дьон сүтүктээхпит. Ол иһигэр 9 оҕо. Ил Дархан бу боппуруоска долгуйар уонна хаһыстаан да  күүстээх үлэни ыытын диэн этэр". 

Саха сирин олохтоохторун харчыларын кэрэйбэккэ уот турбутун бастакы сөкүүндэттэн биллэрэр АДПИ тэрили туруорарга ыҥыраллар.