Саҥа СМАРТ-поликлиника 55 тыһыынчаттан тахса киһини хабар

Леонид Попов Гагарин уокуругун олохтооҕо. Сыллата доруобуйатын туругун көрдөрөн диспансеризация ааһар. Быйыл саҥа үүммүт сылга үгэс быһыытынан эмиэ чинчийии барарга санаммыт. Бу сырыыга саҥа балыыһаҕа кэлэн бырааска көрдөрөргө бары усулуобуйа баарын ыйар.

Леонид Попов, Дьокуускай олохтооҕо: "Сааспынан диспансеризация бара кэллим.Саҥа балыыһа наһаа үчүгэй эбит. Хаан аналиһа туттарыам, онтон терапевт бырааска барыахтаахпын". 

Дьокуускайга 2 №-дээх балыыһа саҥа СМАРТ-поликлиниката үлэлээбитэ иккис ыйыгар барда. Гагарин уокуругар ааспыт сыл бүтүүтэ үлэҕэ киирбит медицинэ киинигэр биир симиэнэҕэ 600-чэкэ киһини көрөр кыахтаахтар. Барыта 55 тыһыынчаттан тахса киһи хабыллар, ол курдук манна Марха, Тулагы-Киллэм, Капитоновка олохтоохторо эмиэ киирсэллэр.

Сахаяна Михайлова, Дьокуускайдааҕы 2№-дээх балыыһа ыарыыны сэрэтэр салаатын сэбиэдиссэйэ: "Күҥҥэ 60-ча киһи кэлэр. Икки симиэнэн үлэлиибит. Сарсыарда 8 чаастан киэһэ 8 чааска диэри прликлиника дьону көрөр. Ону таһынан “Школа зоровья”, “школа артериальной гипертонии”, “Школа здорового образа жизни” бырайыактары үлэлэтэбит".

9 тыһыынча кэриҥэ квадратнай миэтэрэ иэннээх балыыһаҕа диагностыыр уонна терапевтическай, чөлүгэр түһэрэр салаалар, күнүскү стационар, оҕо салаата, дьахтар консультацията, лаборатория, суһал көмө, стоматолог кабинеттара үлэлииллэр.

Виктор Севостьянов, Дьокуускайдааҕы 2№-дээх балыыһа старшай биэлсэрэ: "Бу биһиги кабинеппытыгар дьаҥнаабыт дьон көрдөрүнэн, аттыбытыгар суһал көмө кабинета итиэннэ дьаҥнаабыт оҕолор кабинеттара диэн баар. Оҕолорго суһал көмө эмиэ үлэлиир. Биһиги дьиэлэри кэрийэн эмиэ көрөбүт". 

Поликлиника аныгы систиэмэнэн, туһааннаах тэрилинэн толору хааччыллыбыт. Ол курдук кт, мрт, рентген, маммография, флюрография, цифровой узи оборудованиетынан таҥыллыбыт. Поликлиника сүрүн уратыта диэн биир кэлим ситим нөҥүө ыарыһах туһунан туох баар информация бырааска баар буолар. Оҕо салаатыгар күҥҥэ 180 киһи көрдөрүнүөн сөп. 

Людмила Неустроева, Дьокуускайдааҕы 2№-дээх балыыһа педиатр бырааһа: "Күҥҥэ 30-40 диэри оҕо көрдөрүнэр. Дьаҥ суох кэмигэр улахан уочарат суох. Төрөппүттэр Госуслуги портал нөҥүө суруттараллар. Иккистээн көрүүгэ биһиги бэйэбит суруйабыт".

Нэһилиэнньэ ортотугар сүрэх, тымыр ыарыылара, үрдүк хаан баттааһына, ньиэрбэ ыарыылара элбээбитин быраастар этэллэр. Билигин дьаҥ көдөрүүтэ намыһах. Ыарыыны сэрэппит ордук. Онон доруобуйаны көрүнүү, кэтээһин хайаан да наада.