Өктөм үөрэнээччилэрэ эбии идэни баһылыыллар

Миэбэл чааһа сөптөөхтүк быһыллан тахсыытыгар үөрүйэх уонна сатабыл ирдэнэр. Уһуйааччы Егор Николаевич  11 кылаас уолаттарыгар станогу туттуу ымпыгар-чымпыгар үөрэтэр. Бу  оскуола эбии идэҕэ уһуйар бырагырааматын саҥа арыллыбыт мастарыскыайа. Үөрэнээччи  миэбэл оҥорооччу исписээлинэһин ылан тахсыытыгар бары усулуобуйа олохтоммут.

Даниил Шадрин, Өктөм орто оскуолатын үөрэнээччитэ: "Улахан аппарааттарга үөрэннибит, араас кээмэйдэри быһабыт. Инники олохпутугар бу көмлөһүө дии саныыбын". 

Бу сыах 3 сүрүн хайысхалаах. Миэбэли оҥоруу, оҕуруот аһын олордуу уонна ыҥырыаны иитии. Оскуола 1,5 мөлүөйүөннээх Ил Дархан гранын сүүйбүт, бу үбүнэн оборуудабанньа, оттон выпускниктар, спонсордар, нэһилиэк хомуйбут харчытынан бу дьоһуннаах тутууну оскуола эр дьоно тутан таһаарбыттар. 

Егор Иванов, Өктөм орто оскуолатын дириэктэри солбуйааччы: "Бу сыах оҕолорбутугар анаан. Оҕолорбут үүнэн-сайдан идэ ылан тахсалларыгар  анааммыт туттубут. Оҕуруот аһын олордооччу уонна миэбэл оҥорооччу идэлэрин баһылыылларыгар".  

Ол курдук оскуоланы бүтэрэллэригэр ити ыйыллыбыт икки идэҕэ сертификаттары тутуохтара. Сыах иккис аҥаара ыҥырыаны иитиигэ ананар. Өктөм оскуолата 2014 сыллаахтан бу хайысханан дьарыктанар. 9 кылаас үөрэнээччитэ Гуляев Максим ыҥырыа боруодатын быһаарыынан дьарыгырар. Манна сотору өссө улахан оборуудабанньа кэллэҕинэ чинчийэргэ өссө дэбигис буолуо.

Максим Гуляев, Өктөм орто оскуолатын үөрэнээччитэ: "Уһук Илиҥҥи боруода үчүчгэйдик кыстыыр, элбэх мүөтү биэрэр. Мин манна элбэх уопут ылабын, баҕар ыҥырыа иитиитинэн дьарыктанар буоллахпына олус туһалыа дии саныыбын". 

Агро хайысхалаах оскуола ыҥырыаны итиини тарҕатыынан бу сылларга дьарыктанан кэллэ. Оттон билигин мүөт хаачыстыбатын үрдэтиини ылсыа. Туһааннаах оборуудабанньа атыылаһыллыбыт, айаннаан иһэр. Бу кэскиллээх дьыала тыа хаһаайыстыбатын салаатын сайыннарыыга, каадыры бэлэмнээһиҥҥэ туһуланыа. 

Петр Федотов, Өктөм орто оскуолатын производтвеннай үөрэхтээһин маастара: "Ити хайысхаларга эрдэттэн каадыры бэлэмниир инниттэн бу лабораторияны тэрийдибит. Манна ыҥырыа боруодатын быһаарар исписэлиис буолуохтаах оҕолору интэриэһиргэтиэхпит уонна мүөт хаачыстыбатын быһаарыыга эмиэ исписэлиистэр наадалар".  

Оттон оҕуруот аһын переработката сотору кэминэн үлэлиэ. Бу сыахха оҕо билиини таһынан эргиэҥҥэ эмиэ сыста улаатарын ситиһии олохтонор.