Быйыл хараардыыга уонна мууһу эрбээһиҥҥэ үбүлээһин улаатта

Сааскы халааны сэрэтиигэ Саха сирин өрүстэригэр  мууһу хараардыы, кэбирэтии үлэлэригэр быйыл 69 мөлүйүөн солкуобай үп көрүлүннэ. Маныаха кэнники кэмҥэ туруорсуу түмүгэр, бу сылга кыһалҕалаах сирдэри эбии киллэрдилэр.Онон үлэ кээмэйин кытта үбүлээһин эмиэ эбилиннэ. Ааспыт сылы кытта тэҥнээтэххэ, уонунан мөлүйүөн эбии көрүлүннэ. Биллэрин курдук кэккэ өрүстэргэ кыһалҕалаах учаастак элбэх.

Пётр Аргунов, Өлүөнэтээҕи уу салалтатын салайааччыта: "Өлүөнэҕэ уонна Хамымаҕа уопсайа 55 учаастак, оттон Аммаҕа, Нүүйэҕэ, Алдаҥҥа, Токкоҕо уопсайа 33 учаастак баар. Хараардар иэммит Алдан, Амма Нүүйэ, Токко 216 гектар буолар. Халыма, Өлүөнэ өрүстэргэ үлэ күүскэ баран үлэ кээмэйэ улаатта, уопсай иэн 646 гектар буолла”.

Сааскы халааҥҥа бэлэмнэниигэ туһуламмыт бастакы мунньах Өлүөнэ тардыытынааҕы уу салалтатыгар буолла. Быйылгы халааны куттала суох аһарыыга научнай-техническэй сэбиэккэ киин болҕомтону харыы тахсар учаастактарыгар мууһу кэбирэтии-хараардыы, эрбээһин үлэлэригэр уурдулар. "Центррегионводхоз" тэрилтэ салайааччыта Александр Аржаков Өлүөнэ, Бүлүү Халыма, Алдан, Амма, Нүүйэ, Токко өрүстэргэ туһааннаах  былааннаммыт үлэлэр тустарынан сиһилии билиһиннэрдэ.

Александр Аржаков, "Центррегионводхоз" тэрилтэ дириэктэрэ: "Өлүөнэҕэ, Халымаҕа үлэни ыытабыт. Быйыл саҥа эбийиэктээхпит. Ол курдук Бүлүү өрүскэ Ньурба улууһугар Сата арыыта диэн сиргэ үлэ барыа".

Этиллибитин курдук Өлүөхүмэ, Нам улуустарыгар, итиэннэ Орто Халыма, Ньурба улуустарыгар эбии сирдэр киирэн мууһу кэбирэтии үлэтин ыытыахтара. Маныаха бүгүҥҥү күҥҥэ үгүс өрүстэргэ муус халыҥа чараас, нуорматтан 5-45 сантымыатырга диэри халбаҥныыр. Ол эрээри сорох учаастактарга муус халыҥа нуорманы аһарар.

Вячеслав Шехиров, Дьокуускайдааҕы гидрометеосулууспа салайааччытын солбуйааччы: "Өлүөнэ алын тардыытыгар, Дьааҥы, Индигир, Халыма өрүстэргэ уу уонна хаар саппааһа 30-70% диэри элбэх. Оттон киин улуустарга, Алдан өрүс орто уонна алын тардыытыгар, Анаабырга уонна Бүлүү ууну мунньар хомотугар 10-30% диэри нуорматттан аҕыйах уу уонна хаар баара бэлиэтэнэр".

Билигин халаан хайдах балаһыанньалаах буоларын билгэлиир биллэн турар эрдэ. Барыллаан билгэ гидрометеосулууспа киинэ иһитиннэрбитинэн кулун тутар саҥата тахсыаҕа, онтон чопчу сылык муус  устар ортотун диэки бэлэм буолуоҕа.

Халаан хайдах ааһара күн-дьыл туругуттан, муус халыҥыттан, хаар саппааһыттан быһаччы тутулуктанар. Ол эрээри ханнык да түгэҥҥэ толору бэлэм буолуу ирдэнэр", - Татьяна Николаева, корреспондент.