Баһаары утары үлэ күүһүрэр
10№-дээх баһаарынай чаас үлэһиттэрэ элбэх оҕолоох ыал дьиэтигэр киирэллэр. Кинилэри дьиэ хаһаайката Майя Горохова көрсөр. Бу дьиэҕэ кинилэр соторутааҕыта көһөн киирбиттэр. Тутуу олус улахан, 2 этээстээх, онон хаһаайыттар бастакы уочарат баһаартан сэрэхтээх буолууга болҕомтолорун уурбуттар.
"Баһаары сэрэт - АДПИ-ны туруор" аахсыйа чэрчитинэн Кангалаас элбэх оҕолоох ыалыгар уоттан сэрэтэр оборуудабанньаны 10№-дээх баһаарынай чаас үлэһиттэрэ анаан-минээн дьиэҕэ туруора кэллилэр. Бу тэрил хайдах үлэлиирин кэпсээн, туорууру саҕаланар. Аан бастакынан саала истиэндэтигэр АДПИ ыйанар.
"Бу тэрили иилии олус судургу. Ол курдук иниспиэктэрдэр икки оборуудабанньаны туруордулар. Көрөгүт курдук хоско иилэллэр", - Анастасия Добрянцева, корреспондент.
Баһаары утары сулууспа үлэһиттэрэ хайаан даҕаны икки тэрили ыйыыллар. Бастакыны саалаҕа, иккиһин утуйар хоско. Бу уоттан харысхалы икки бүк күүһүрдэр.
Майя Горохова, Кангалаас олохтооҕо: "Оҕо да арааһы холбуон сөп, бэйэбит да ас холбоон баран умнуохпутун сөп. Электроника бөҕө холбуубут, онон АДПИ наһаа наадалаах".
АДПИ олус кыра эрээри суһал тирээтэҕинэ саамай көдьүүстээх тэрил буолар. Статистика көрдөрөрүнэн бу буруо датчига үгүс ыал олоҕун быыһаабыт. Маны чааһынай эрэ дьиэлэргэ буолбакка, элбэх кыбартыралаах дьиэлэргэ эмиэ туруораллар.
Спартак Родионов, 10№-дээх баһаарынай чаас салайааччыта: "Кангалаас нэһилиэгэр 137 АДПИ туруорулунна. Нэдиэлэ ахсын сэрэтэр үлэ ыытыллар, сезон ахсын аахсыйалары ыытабыт".
Уоттан сэрэхтээх буолуу - үрдүкү салалта хонтруолугар турар. Ил Дархан Айсен Николаев сорудаҕынан өрөспүүбүлүкэ бары улуустарыгар бу хайысхаҕа үлэ күүһүрдэ.
Дмитрий Садовников, СӨ Бырабыыталыстыбатын бастакы солбуйааччы: "Биһиги итиннэ үлэлэһиэхпит. Ити үлэ түмүгүн бастакы кыбаартан кэннэ дакылааттыыр сурук быһыытынан киллэрэрбитин Айсен Николаев сорудах биэрдэ".
АДПИ-ны туруоруу үлэтэ билигин өрөспүүбүлүкэ үрдүнэн күүстээхтик ыытыллан саҕаланна. Ким баҕалаах олохтоох дьаһалатаҕа сайаапка түһэрин эбэтэр бэйэҕит атыылаһан туруорагытыгар ыҥыраллар.