Бөрө кыһалҕата сыл эргиччи тыа хаһаайыстыбатын хаарыйар

Хаарга хаалбыт суолу хас биирдиитин сылыйан көрөллөр. Исписэлиистэр тута ыт суола диэн быһаараллар. Ол эрэн талах арыы диэки орох тэбиллибитин көрөн, үөһэттэн көрөргө кыһаараллар. Квадрокоптерга көстөрүнэн уол-иис элбэх. туох да кыыл баар сибикитэ көстүбэт.

Дмитрий Николаев, Айылҕа баайын уонна ураты харыстанар сирдэр дирекцияларын исписэлииһэ: «Суоллар эрэ бааллар. Ыт, саһыл суола элбэх».

Аҕыйах хонуктааҕыта бу турар сирбитигэр куорат олохтооҕо устубут видеота куйаар ситимигэр киэҥник тарҕанна. Манна ааптар бөрө үөрэ сылдьар диэн кэпсиир. Дьон санаата хайдыһан социальнай ситимнэргэ үгүс мөккүөр тахса сырытта. Онон бөрөлөр дуу ыттар дуу сылдьыбыттарын быһаара исписэлиистэр таҕыстылар. Ыраас хаарга суол үгүс, билэр киһиэхэ кинигэҕэ кэриэтэ ырылхайдык барыта көстө сытар.

Левин Николай, Айылҕа баайын уонна ураты харыстанар сирдэр дирекцияларын исписэлииһэ: «Бөрө суолугар майгынныыр суолу булбатыбыт. Биһи көрөрбүтүнэн элбэх балыксыт сылдьыбыт ыттаах».

Салгыы арыы аннараа өттүгэр айанныыбыт. Манна арыый интэриэһинэй көстүү буолла. Суол ортотугар улахан тилэх суола чопчу хаалбыта көстөр. Аны бу булумньу саамай сүрүнэ-хаарга анньыллыбыт маһы бэлиэтээн ааспыт. Исписэлиистэр тута хаһыйан ыллылар. Салгыы анализка туттарыахтара. 

Аны Хатаһынан өлүөнэни туоруур сиргэ эмиэ хас да бөрөҕө маарынныыр үөр сылдьарын көрбүттэрэ тарҕанна. Онон исписэлсситэргэ бу көстүүнү чопчу быһаарар сорук турар. Саха сиригэр бөрө ахсаана барыллаан 3 тыһыынча кэриҥэ диэн ааҕыллар. сыллата ахсааннара 300 элбиир. Оттон адьырҕаны утары үбүлээһин сылтан сыл кытаатар.

Иннокентий Семенов, Айылҕа баайын уонна ураты харыстанар сирдэр дирекцияларын салайааччытын солбуйааччы: «Быйыл 2026 сыллаахха биһиэхэ үп-харчы көрүллүбэтэх. Баҕар эбии үбүлээһин түмүгүнэн баҕар туох эмэ тахсыа диэн эрэнэ сатыыбыт. Син биир үлэ бара турар. Бастатан туран даннай хомуйабыт, мониторинг оҥоробут».

Аҥаардас ааспыт сылга 14,5 тыһыынча дьиэ табатын сиэбиттэрэ биллэр. Үбүлээһин биригээдэлэри тэрийиигэ суох, ону таһынан тирии төлөбүрэ эмиэ салгыҥҥа ыйанар. Онон булчуту көҕүлүүр.