Өймөкөөн улууһа икки улахан халаан кэннэ чөлүгэр түстэ

Өймөкөөн сиригэр-уотугар алгыс тыл этиллэр, аал уот оттуллар. Икки улахан халаан кэннэ иккистээн тыын ылан Тымныы полюһа дьону-сэргэни көрсөр. Ол аата айылҕа содулун кэннэ олох бэйэтин укулаатыгар киирбит. Билигин сүрүн сорук - маннык быһылаан хатыламматын туһугар үгүс өрүттээх үлэни ыытыы.

Алексей Федотов, Өймөкөөн улууһун баһылыгын солбуйааччы: «Салгыы маннык буолбатын туһугар анал үөрэтиилэр бара тураллар. Индигиир өрүс руслатын уларыталларыгар уонна биэрэк күүһүрдэр үөрэтиилэр бара тураллар».

Оттон бу киһи дьиксинэ көрөр каадырдара 6 ый анараа өттүгэр уһуллубута. 360 тахса тэлгэһэҕэ уу киирбитэ, 130 тахса дьиэ алдьаммыта итиэннэ 30 килэмиэтир суол суураллыбыта. Маны таһынан оттуур ходуһа 80 бырыһыана халааҥҥа былдьаммыта. Бу үлүгэрдээх улахан кээһэниини Саха сирэ бүттүүнэ ылсан кылгас кэм иһигэр Өйкөкөөн сирэ-уота чөлүгэр түстэ. 

Наталья Реброва, Өймөкөөн нэһилиэгин дьаһалтатын исписэлииһэ: «Өрөспүүбүлүкэ араас муннуктарыттан биригээдэлэр уонна министиэристибэ волонтердара кэлэн үлэлээн, көмөлөһөн бардылар. 9 массыына тутуу матырыйааллара кэлэннэр эмсэҕэлээбит ыалларга түҥэтиллибиттэрэ. 425 туонна от кэлбитэ».

Өймөкөөн нэһилиэгин биир бас-көс киһитэ Тамара Васильева сайыҥҥы халааҥҥа дьиэтэ хайдах эмсэҕэлээбитин кэпсиир.  Тымныы полюһун саамай биллэр дьиэтэ билигин чөлүгэр түһэн туристары күннэтэ көрсөр.Тамара Егоровна өрүс сүннэ сыллата уларыйарын үллэстэр.

Тамара Васильева, Өймөкөөн нэһилиэгин олохтооҕо, краевед, историк: «Река приближается. Раньше, где сейчас Индигирка течет, дома были».

Онон чинчийиигэ билигин сүрүн болҕомто ууруллуо. Оттон чөлүгэр түһэриигэ уопсайа 260 тахса мөлүйүөн сууммалаах үлэ барда. Ол иһигэр 5 олох оҥоһуллар кыаҕа суох дьиэни саҥаттаан туттулар. Итини сэргэ ититии ситимин оннугар түһэриигэ кылгас кэм иһигэр улахан үлэ барда.

Александр Оконешников, Өймөкөөн улууһун баһылыга: «Түргэнник восстановление үлэтэ ааһан ититии этэҥҥэ бэриллибитэ. Кыстыкка киирэрбитигэр суол сабылла илигинэ оппут кэлэн дьон үөрүүтэ муҥура суох».

Ити курдук Саха сирэ бүттүүнэ көмөҕө туран Өймөкөөн чөлүгэр түстэ.