Томороон тымныыга табыллар таһаарыылаах үлэ
Эрбиини туттуох иннинэ бу курдук дьөлө үүттэн муус халыҥын бэрэбиэркэлииллэр. Кээмэйдээбэккэ эрэ эрбээн, алҕас ууну киллэрдэххэ үлэ халтайга барар. Суудуналары сайыҥҥыга бэлэмнээһин кыһын бу курдук чымпыктаахтык, ыараханнык барар. Муҥутаан тымныы турдаҕына үлэлэнэр үлэ, муус түргэнник халыҥыыр, көйөргө табыгастаах буолар. Маннык тыйыс усулуобуйаҕа туһааннаах сиргэ тиийэр сыалтан сытан эрэ кытта үлэлииллэр. Онон саамай тулуурдаахтар эрэ ылсаллар.
Артём Жуков, ЛОРП тэрилтэ мууһу көйөн суудунаны ириэрээччи: "Бу үлэ технологиятын билэрин таһынан тулуур ирдэнэр. Тымныы биһиги доҕорбут, төһөнөн тымныы да муус түргэнник тоҥор, кытаанах буолар".
Сайыҥҥы өттүгэр дьону сынньалаҥҥа таһар аатырбыт "Михаил Светлов" теплоходу биэс сиринэн хаһаллар. Эһиилги сылга хас да саҥа маршруттар баар буолуохтара. Онон хас да бүк сыныйан туран өрөмүөннэниэ.
Бу курдук кыра-кыралаан кээрэтэн икки миэтэрэ дириҥҥэ киириэхтээхтээхтэр, онтон аны теплоход аннынан эмиэ иккилии миэтэрэни баран, хаһыылары силбэһиннэриэхтээхтэр. Урут да билигин да илии үлэтин бу дьыалаҕа туох да солбуйбат. Тулуур уонна бэринии эрэ ирдэнэр.
"Көстөрүн курдук суудунаны ириэрээччилэр бастаан мууһу эрбииллэр итиэннэ кайло диэн ааттанар илии үнүстүрүмүөнүнэн эрэ 100 кууп мууһу көйөллөр", - Мария Дмитриева, корреспондент.
Уу суола олус кылгас кэмҥэ арыллар, онон кыһыҥҥы тымныылары мүччү туппакка бэлэмнэннэххэ эрэ навигация этэҥҥэ барар. Бу курдук сантымыатырдыынан кээрэтэн уу аалларын сүрүн алдьанар сирдэригэр тиийиэхтэрэ. Хас биирдии аалга иккилии киһи ананар. Уопсайа ЛОРП тэрилтэҕэ бу маннык сэдэх идэлээх 12 киһи исписэлиис баар.
Дмитрий Громов, ЛОРП тэрилтэ туризм уонна дьону таһыы салаатын салайааччы: "Ахсынньы 1 күнүттэн аалларбытын өрөмүөннээн саҕалаатыбыт. Сыл ахсын томороон тымныылары туһанан хараабыл аннынан киирэн оҥороллор. Быйыл 30-тан тахса аалы өрөмүөҥҥэ туруордубут. Суудуналар аллараа өттүлэрин, биинтэлэрин, урууллуур чаастарын көрөллөр-истэллэр, сайыҥҥыга бэлэмнииллэр".
Маны тэҥэ ЛОРП тэрилтэ Томпо уонна Уус Маайа улуустарыгар баар аллар турар сирдэрин көйөн саҕалаатылар. Уопсайа барыта 38 суудунаны кэлэр ый бүтүөр диэри түмүктүөхтэрэ. Үлэ таһаарыылаах буолуутугар Кириһиэнньэ тымныылара түһэрин күүтэллэр.