Кэлэр сылга олохпутугар-дьаһахпытыгар, сокуоҥҥа, үп-харчы өттүгэр саҥа уларыйыылар киирэллэр

Үүнэр 2026 сылтан хамнас алын кээмэйэ 20-тэн тахса бырыһыан улаатыаҕа. Онон МРОТ үрдээһинэ буоларын курдук хамнаска уонна социальнай төлөбүр тиһигэр дьайар. Онон тохсунньу бастакы күнүттэн биир кэлим босуобуйа кээмэйигэр уонна ананыытыгар кэккэ уларыйыылар киирэллэр.

Алексей Шамаев, РФ социальнай пуондатын СӨ салаатын оҕолоох дьиэ кэргэни өйүүр өттүнэн хааччыйар салалта начальнигын солбуйааччы: «2025 сылтан 4 МРОТ ирдэнэр этэ 18 сааһын туолбут дьиэ кэргэн чилиэниттэн. Эһиилгэттэн 8 МРОТ буолар. Биир МРОТ 27093 солк буолар. Ол аата 8 МРОТ 216470 буолар».

Маны тэҥэ дохуоту ааҕыыга аахсыллар бириичинэҕэ пенсия эмиэ киирэр буолар. Босуобуйа ортотунан зонтаттан көрөн биир тыһыынчаттан тахса солкуобайынан эбиллиэҕэ.  Маны тэҥэ сыллата буоларын курдук пенсия индексацияланыаҕа.

Роман Афанасьев, РФ социальнай пуондатын СӨ салаатын биэнсийэҕэ тахсыыга эрдэттэн үлэни ыытар салаатын салайааччытын солбуйааччы: «Үлэлиир, үлэлээбиэт диэн буолбакка, биэнсийэ ылааччыларга барыларгыар индексация оҥоһуллуохтаах. Индексация күүтүллэр кээмэйэ 7,6% өрөспүүбүлүкэ үрдүнэн ыллахха 1,5 тыһ. курдук буолар».

Ону тэҥэ 5тэн элбэх оҕолоох ийэлэргэ страховой пенсия хос ааҕыллыаҕа. Бу перерачет кэлэр өттүгэр биэнсийэҕэ тахсыахтаах да, билигин биэнсийэни ылар да дьахталларга тарҕанар. Дойду үрдүнэн ыытылла турар нолуок реформата кэлэр 2026 сылга саамай киэҥ далааһыннаах буолара күүтүллэр. Уларыйыы НДСтан саҕалаан страховой төлөбүр, дохуот, баай-дуол, патентнай систиэмэ хайысхаларын хабар. Чуолаан  тэрилтэлэргэ уонна урбаанньыттарга сыанатыгар эбиллибит нолуок ыстаапката үрдүүр. 20 бырыһыантан 22 диэри. Маныаха чэпчэтиллибит ставканы талар кыах баар.Оттон физическэй сирэйдэргэ саҥа сылтан ИНН кумааҕыта бэриллибэт буолар.

Пелагея Гуляева, федеральнай нолуок сулууспатын СӨ салалтатын 1№ -дээх судаарыстыбаннай өҥөлөрү оҥорор салаатын исписэлииһэ: «ИНН кумаахытын выписка из единого госреестра налогоплательщика солбуйуоҕа. Бу выписка нолуок уорганыгар учуокка туралларын туоһулуур кумаахы буолуоҕа. Бу выписканы бэйэлэрэ нолуогабай саайтыттан таһааттарыахтарын сөп».

Уларыйыылар олох бары эйгэтигэр киирэллэр. Суолга-иискэ куттала суох айаны хааччыйыы сокуонугар эмиэ, чуолаан кэтээн көрүү ирдэбилэ күүһүрүөҕэ. 

Кюннэй Иванова, Госавтоинспекция салалтатын аналитическай үлэҕэ уонна суолга-иискэ куттал суох буолуутун салаатын начальнигын солбуйааччы: «Фото- видеофиксация үлэтэ элбиэҕэ. Ол курдук, страховканы көрөр камералар кэлиэхтэрэ. Уонна диагностическай карталары көрөр камералар туруохтара».

Уларыйыылар манан эрэ бүппэттэр, биллэрин курдук саҥа сокуоннарынан - саҥа ирдэбил.