Быйыл Саха сиригэр тутуу үлэтэ былаанын куоһарда

Дьокуускайга, сыл бүтүүтэ олоххо-дьаһахха улахан суолталаах эбийиэк Звезднай саҥа түөлбэтигэр уу станцията үлэҕэ киириитэ буолла. Чааска 200-тэн тахса кубометр ууну аһардар кыахтаах станция иһэр уунан Звезднай олохтоохтоорун эрэ буолбакка, киин куорат соҕуруу өттүн барытын хааччыйыаҕа. Саҥа эбийиэк Дьокуускай куорат маастар-былаанынан тутуллан олоххо киирдэ.

Онтон өссө биир улахан суолталаах саҥа эбийиэк Спортивнай түөлбэҕэ бастакы уһуйаан арыллыыта буолар. Оҕо уһуйаана 240 миэстэлээх, 4 тыһыынча кэриҥэ кв.м. иэннээх. Манна оҕо сайдарыгар, дьоҕурун сайыннарарыгар туох баар усулуобуйа барыта тэриллибит.

Саргылаана Саидова, 43№-дээх "Улыбка" уһуйаан сэбиэдиссэйин солбуйааччы: «2019 сылтан “Шахматы детям”, “Мозаичный парк” 2020 сылтан уонна араас хайысханан үлэлиибит. Быйылгы сылтан Арассыыйатааҕы “Орлята дошколята” бырайыагынан үлэлиибит».

Сырдык киэн, анал хостордоох, Кэмпэндээйи эмтээх тууһун салгынынан оҕолор чэбдигирдэр анал хосторо тиийэ баар. Саҥа оҕо уһуйааныгар оҕолору анал быраграманан дьарыктыахтара, сахалыы уонна нууччалыы үөрэтиэхтэрэ.

Ааһан эрэр сыл үөрэх эйгэтигэр биир баараҕай тутуута бастакы Президент Михаил Николаев аатынан 990 миэстэлээх саҥа оскуола буолар. Үүнэр көлүөнэ сайдарыгар, иитии-үөрэтии саҥа эйгэтин тэрийиигэ туох баар усулуобуйа барыта тэриллибит.

Нюргуна Соколова, СӨ үөрэх уонна билим миниистирэ: «Бу сылга биһиги үөрүүлээх түгэннэрбитин оскуолаларга даҕаны, уһуйааннарга даҕаны, билэргит курдук бу коррекционнай оскуалабытыгар детсад тутулла турар. Бу күннэргэ спортзал даҕаны, оскуола даҕаны тутуллан киириэхтэрэ».

Быйыл Өрөспүүбүлүкэ үрдүнэн тутуу үлэтэ тэтимнээхтик барда. Бары хайысхаҕа саҥа эбийиэктэр тутуллан олоххо киирдилэр. Маныаха национальнай бырайыак чэрчитинэн барар үлэ 2030 сылга диэри былааннан, үлэтэ салҕанар.

Виктор Романов, СӨ тутуу миниистирэ: «Иккис сылын дьиэ тутуутугар рекорд көрдөрүүтүн оҥоробут. Социальнай эбийиэктэр тутуулара салҕанар. Президеммыт бигэргэппит маастар-былааннар уонна опорнай пууннар чэрчилэринэн».

Өрөспүүбүлүкэҕэ эти-хааны чэбдигирдэр саҥа элбэх хайысхалаах успуорт саҥа кииннэрэ, оҕо спортивнай оскуолалара тутуллан үлэҕэ киирдилэр.

Леонид Спиритдонов, СӨ физическэй култуураҕа уонна спортка миниистирэ: «Манна элбэх оҕо кэлэн эрчиллиэҕэ. Тутуулар уонна спорпут сайдыыта барыта оҕолорбутугар буолар. Кинилэр дьарыктанан, ситиһиилээх уонна доруобай буолуннар диэн үлэ-хамнас барар».

Быйыл саҥа култуура дьиэлэрэ эмиэ арыллыннылар, маны сэргэ, оҕо искусстватын оскуолаларыгар, түмэллэргэ, библиотекаҕа саҥардыы, өрөмүөн үлэтэ ыытыллынна. Эһиил, 2026 сыл -  култуура сыла биллэрииллэн турар, онон кэлэр сылга икки баараҕай эбийиэк үлэҕэ киирэрэ былааннанар.

Сергей Местников, СӨ бырабыытылыстыбатын бэрэссэдээтэлин солбуйааччы: «Үрдүкү муусука оскуолата тутуллан киириэҕэ. Бу эбийиэк дойдубут Президенэ Влдимир Путин тус сорудаҕынан тутулла турар эбийиэк. Сыл бүтүөр дылы олоххо киллэриэхтээхпит. Арктикатааҕы эпос уонна искусство дьиэтэ тутулла турар, эмиэ кэлэр сыл бүтүөр диэри тутуллан киириэҕэ».

Ил Дархан Айсен Николаев сыл бүтүүтэ үгэс быһыытынан Өрөспүүбүлүкэ үрдүнэн саҥа эбийиэктэри арыйар.

Ол курдук 8 саҥа социальнай суолталаах эбийиэк үлэҕэ киирдэ. Уопсайа 13 тыһыынча квадратнай миэтэрэ иэннээх дьиэ, 2 миллиард кэриҥэ үбүлээһин. Быйыл Өрөспүүбүлүкэҕэ 2025 сыл түмүгүнэн 40-ча улахан суолталаах, социальнай эбийиэк тутуллан үлэҕэ киирдэ.