Оскуолаларга, уһуйааннарга Саҥа Дьыллааҕы тэрээһиннэр саҕаланнылар

Дьокуускайдааҕы 31 нүөмэрдээх оскуола алын сүһүөҕүн үөрэнээччилэригэр кэтэһиилээх күн үүннэ. Саҥа Дьыллааҕы утренник сүпсүлгэнэ үүнэн, оҕолор оҥостон, маскараат, көстүүм кэтэн бырааһынньыкка бэлэмнэр. Үүнэр көлүөнэ театырын артыыстара аны аҕыйах мүнүүтэнэн Аптаах сундук кистэлэҥэ диэн остуоруйаны көрдөрүөхтэрэ.

Айталыына Яковлева, үүнэр көлүөнэ театырын артыыһа: «Игин араас остуоруйалартан быһа тардан биир остуоруйаҕа баар буола түһэллэр уонна Саҥа Дьылы быыһыы сатыыллар».

Маша уонна эһэ мультфильм сүрүн дьоруойдарын оҕолор бэрт сэргии көрсөллөр. 31-дээх оскуола бүтүн Саха сирин биир саамай элбэх үөрэнээччилээх бөдөҥ оскуоларыттан биирдэстэрэ. Саҥа дьыллааҕы тэрээһиннэрин кылаастарынан тус-туһунан бөлөххө арааран ыыталлар.

Татьяна Шматкова, Дьокуускайдааҕы 31№-дээх оскуола учуутала: «Кылааспар 36 оҕо үөрэнэр. Иккис чиэппэри үчүгэйдик түмүктээтибит. Икки отличниктаахпын, 23 хорошистаахпын».

3 кылаас үөрэнээччитэ Сайаана Шамаева иккис чэппэрин туйгуннук бүтэрэн дипломнаах Саҥа дьылын көрсөр. Сайаана кылааһын оҕолоругар үөрэхтэригэр ситиһиини баҕарар, дьиэ кэргэнин эмиэ умнубат.

Сайаана Шамаева, Дьокуускайдааҕы 31№-дээх оскуола үөрэнээччитэ: «Ийэлээх аҕам доруобай буолуннар, үөрэ-көтө сырыттыннар. Балтым быраатым эйэлээх буолуннар».

Оттон Дамир Никифоров үөрэҕин 3 суох түмктээбит, хорошист.

Дамир Никифоров, Дьокуускайдааҕы 31№-дээх оскуола үөрэнээччитэ: «Дрон, массыына уонна бластер баҕарабын».

Үүнэр көлүөнэ театыра бу остуоруйаны кытта өссө биир испиктээкили бэлэмнээн сылдьар. Онон бу күннэртэн саҕалаан тохсунньу ый бастакы күннэригэр диэри артыыстарга саамай түбүктээх кэм үүнэр.

Юрий Афанасьев, үүнэр көлүөнэ театырын артыыһа: «Утренниктарынан куорат оскуолаларын кэрийэбит. Саҥа дьыл кэннэ куорат чугастааҕы нэһилиэктэринэн барыахтаахпыт».

Остуоруйаҕа буоларын курдук үтүө санаа кыайан омсолоох геройдар кыаттаран Саҥа Дьыл бырааһынньыга быыһанар. Тымныы Моруос оҕонньор кэһиилээх кэлэн харыйа уотун уматар. Саха сирин үтүөлээх артыыһа Мария Данилова ааһан эрэ сыл элбэх үтүө түгэннэри, ситиһиини бэлэхтээтэ диэн этэр.

Мария Данилова, үүнэр көлүөнэ театырын артыыһа: «Биһиги сылы наһаа үчүгэйдик түмүктээн эрэбит. Үлэ бөҕөтүн үлэлээтибит, Кыһыл көмүс мааскаҕа тиийэ. Арааһынай улахан бэстибээллэргэ кытынныбыт, саҥа туруорууларбытынан көрөччүлэри үөртүбүт».

Түмүккэ буоларын курдук улахан харыйа тула оонньуу-көр, хоровод тэрилиннэ. Бары дуоһуйан минньигэс кэһиилэрин ылан сыл бастыҥ тэрээһинин атаардылар.