Саҥа дьыллааҕы сүпсүлгэн чугаһаабытынан тустаах суһал сулууспалар үлэлэрэ күүһүрэр
Саҥа Дьыллааҕы аймалҕан оргуйан олорор. Дьокуускай суоллара бүтүннүү масыыналарынан туолан, кэлии-барыы үгэс быһыытынан үксээн турар кэмэ. Күн ахсын ГАИ инспиэктэрдэрэ куорат саамай сырыылаах суолларыгар маннык бэрэбиэркэ рейдэлэри ыыталлар.
Максим Ефремов, ДПС инспиэктэрэ: «Дөкүмүөннэрин, массыыналарын иһин-таһын бэрэбиэркэлиибит».
Лермонтов уулуссатыгар күнүстэри-түннэри айан-сырыы тиһигин быспат. Бу ый саҥатыттан тохсунньу 11 күнүгэр диэри суолга-искэ куттал суох буолуутун хааччыйар инниттэн күүһүрдүллүбүт режим олохтонно.
Сергей Петров, Дьокуускай олохтооҕо: «Тутуһабыт, түргэнник айаннаабаппыт, барытын көрөн-истэн сылдьабыт».
Сыл түмүктэнэрэ аҕыйах күн хаалла, онтон суол быһылааныгар статистика чахчытын ыллахха, былырыыҥҥыны кытта үгүс көрдөрүүлэринэн үрдээһин бэлиэтэнэр. Сыл саҕаланыаҕыттан өрөспүүбүлүкэ үрдүнэн уопсайа 689 суол саахала тахсыбытын түмүгэр 80 киһи суорума суолланна, 880-тан тахса киһи араас эчэйиини ылла. Онон, суолга-искэ хонтуруол тохтообот.
Кюннэй Иванова, Госавтоинспекция салалтатын аналитическай үлэҕэ уонна суолга-иискэ куттал суох буолуутугар салаатын салайааччытын солбуйааччы: «Саамай улахан кэһиилэри бэрэбиэркэ үлэтэ барыаҕа – итирик уруулга олоруу, утары айан суолугар киирии уонна оҕону, дьоннору таһыыга улахан болҕомто ууруллуоҕа».
Ааспыт 2024 сылы кытта тэҥнээтэххэ, быйыл суол саахалын уонна эчэйбит дьон ахсаана аҕыйаабыт эрээри, суорума суолламмыт дьон ахсаана элбээтэ. Күннэтэ суол-иис кыттааччылара, сатыы сылдьааччылар, суоппардар айан суолугар бэрт сэрэхтээх буолалларыгар ыҥыраллар.
Жанна Макарова, Дьокуускайдааҕы суол судаарыстыбаннай иниспиэксийэтин өйдөтөр-сырдатар үлэҕэ салаатын иниспиэктэрэ: «Сөптөөх оскуораһы, дистанцияны тутуһа сылдьын. Хайаан даҕаны айанныаххыт иннинэ тимир көлөҕүт туругун көрүҥ уонна фараларгытын холбуургутун умнуман».
Ону тэҥэ өрөспүүбүлүкэ үрдүнэн тохсунньу 9 күнүгэр диэри "Болҕойуҥ оҕолор" диэн сэрэтии тэрээһинэ былаан быһыытынан тэриллэр.
Быйыл уопсайа 156 массыынаны уорбуттара бэлиэтэммит. Онтон 73 эрэ булбуттар. Онон суоппардар массыынаҕытын, таһаҕаскытын үчүгэйдик көрүнүҥ диэн сүбэлииллэр.