Саҥа Дьылы көрсө Ил Дархан судаарыстыбаннай наҕараадалары туттарда

Ньурба улууһун Хатыҥ Арыы нэһилиэгиттэн сылдьар Анегина, Герман Тобоновтар Родительская Слава уордьанынан наҕараадаланнылар. 5 оҕолоох дьиэ кэргэн икки улахаттара устудьуоннар, кыралара оскуола үөрэнээччилэрэ, үөрэхтэригэр бары туйгуннар. Оҕо ситиһиитэ- төрөппүт ситиһиитэ. Тобоновтар оҕолорун кыратыттан үөрэхтэригэр кыһалларга уонна үлэни өрө тутарга үөрэтэллэр.

Анегина, Герман Тобоновтар, Ньурба улууһун олохтоохторо: «Үөрэхтэригэр үчүгэйдэр. Кыраларыттан үлэни уонна киһини көрөн-истэн билиэхтэрин наада».

Саҥа сылы көрсө Ил Дархан Айсен Николаев Саха сирин сайдыытыгар бэйэлэрин кылааттарын киллэрбит үлэһит туруу дьону наҕараадалаата. Ол курдук дойду, өрөспүүбүлүкэ таһымнаах бочуоттаах аатынан, грамотанан, туйгун бэлиэнэн, махтал суругунан 40-ча киһи наҕараадаланна. Олор истэригэр анал байыаннай дьайыы кыттыылааҕа Өймөкөөн улууһуттан сылдьар Владимир Колесов киирдэ. Кини хамандыырын быыһаан эр санаалаах буолуу иһин уордьанынан наҕараадаланна. Билигин Владмир уоппускаҕа кэлэ сылдьар.

Владимир Колесов, анал байыаннай дьайыы кыттыылааҕа: «Хантараак баттаан сэриигэ баран бааһыран кэллим».

Олох-дьаһах араас эйгэтин үлэһиттэрэ үтүөлээх ааттарынан, бэлиэлэринэн, махтал, бочуоттаах суруктарынан бэлиэтэннилэр. Ол курдук учуутал, быраас, транспорт, тутуу, олох-дьаһах хаһаайыстыбатын үлэһитэ бэриниилээх үлэтин иһин наҕараада тутта. Култуура эйгэтиттэн Саха өрөспүүбүлүкэтин үтүөлээх артыыһа үдүкү ааты Саха театырын артыыһа Елена Маркова ылар чиэскэ тигистэ. Елена сүүрбэтэн тахса сыл устата Саха театырын сыанатыгар чаҕылхай уобарастары толорон көрөөччү биһирэбилин ылар.

Елена Маркова, Саха театырын артыыһа: «Саха тыйаатырыгар үлэлээбитим 23 сыл буолла. Үлэ түмүгэ сыаналанан, улахан чиэс-бочуот дии саныыбын. Махталым бииргэ үлэлиир дьоммор, тэрилтэбэр, дойдубар уонна биллэн туран дьиэ кэргэммэр».

Хаҥалас улууһун олохтооҕо Виктор Михайлов үйэтин тухары экология салаатыгар, ол курдук 30-тан тахса сыл устата булт инспиэктэринэн үлэлээбитэ. Виктор Прокопьевич Гражданскай килбиэн уордьан хаһаайынынан буолла. Кини ханнык баҕарар үлэҕэ дьоҥҥо үтүө сыһыан ирдэнэр диэн санаалаах. 

Виктор Михайлов, Хаҥалас улууһун олохтооҕо: «Үлэлии сылдьар дьоннорго үчүгэйдик сыһыаннаһыахха наада, дьоннору өйдүүллэрин курдук, оччоҕуна киһини убаастыыллар уонна өйдүүллэр».

Гражданскай килбиэн наҕарааданы 8 киһиэхэ туттрардылар. Дойду үтүөлээх учуутала бочуоттаах ааты Өрөспүүбүлүкэтээҕи лицей-интернат учуутала Илья Кысылбаиков ылла. Кини 17 үөрэнээччитэ биир кэлим эксээмэни 100 балга туттарбыта.