МЧС инспиэктэрдэрэ бэрэбиэркэ, өйдөтүү үлэтин ыыталлар

Саҥа дьыл тыына биллэн киин куоракка пиротехника атыыта саҕаланна. Ону кытары тэҥҥэ ыксаллаах быһыы-майгы министиэристибэтин иниспиэктэрдэрэ үлэлэрэ күүһүрдэ. Тыастаах-уустаах, уоттаах-күөстээх табаар атыыта ханна оҥоһуллубута бастатан туран көрүллэр.

Билигин сорох кэлии фейрверкалар, ракета салюттар, петардалар сөптөөх оҥоһуута суох кэлэллэр. Онон туоһу докумуоҥҥа, сертификаакка, таҥыллыбыт болдьоҕор улахан болҕомто ууруллар диэн исписэлиистэр иһитиннэрэллэр. Номнуо атыы туочукаларыгар кэһиилэр булуллубуттар.

Василий Самсонов, Дьокуускайдааҕы баһаар кэтэбилин уонна профилактическай үлэ салаатын судаарыстыбаннай иниспиэктэрэ: «10-ча кэһии баар, ону номнуо көннөрө сылдьаллар. Кэһиилэр – фейерверкалары сөбө суох сиргэ харайыы уонна уот уумулларар тэриллэрэ суох».

Атыыһыттар бу быраабыланы туох да эҥкилэ суох билиэхтээхтэр. Маныаха хайаан даҕаны атыылаһар дьоҥҥо сэрэхтээх буолуу быраабылатын иһитиннэриэхтээхтэр. Саамай сүрүн болҕомто эстиитигэр сытар диэн атыыһыт Юлия Борисова кэпсиир.

Юлия Борисова, атыыһыт: «Бастаан хаста ытарын көрөҕүн, кээмэйин, сыанатын уонна төһө өр умайарын, ытарын».

Билигин 10-тан тахса атыы туочуката бэрэбиэркэлэннэ. Өссө да атыылыыр сирдэр эбиллэ тураллар диэн инспиэктэрдэр этэллэр. Саҥа дьыллааҕыы түүн этэҥҥэ ааһарыгар исписэлиистэр уоту-күөһү анал миэстэҕэ ытарга субэлииллэр.  Маныаха анал, докумуоннаах маҕааһыыннартан пиротехниканы атыылаһар оруннаах. Бу хайысхаҕа риэйдэлэр салҕанан бара тураллар.