Экология министиэристибэтэ сыл түмүгүн таһаарар
"Хатылы кэскилэ" оскуола лесничествотын чилиэнэ Ярослав Жендринскай Чурапчы улууһун аатыттан 4 төгүлүн ыытылла слекка кэлэ сылдьар. Кинилэр быйыл Өрөспүүбүлүкэтээҕи оскуолалартан барыларыттан бастыҥнарынан ааҕыллыбыттара. Үлэлэрин сүрүн оҥкула - айылҕаны харыстааһын буолар.
Ярослав Жендринский, слёт кыттыылааҕа: «Бөх хомуйабыт, араас бытыылка, кумаахы, табах окуурога наһаа элбэх буолааччы. 3-4 куул курдук хомуйааччыбыт».
Быйылгы слет 8 оскуола түмсүүлэрин Арктикатааҕы судаарыстыбаннай агротехнологическай университет уораҕайыгар түмтэ. Өссө да элбэх хамаанда кэлиэҕин күн-дьыл туругуттан сатаан кэлбэтэхтэр. Ол да буоллар тэрээһин хас да хайысханан ыытыллынна.
Тустаах тэрээһин экология министиэристбэтэ сыллааҕы түмүгүн таһаарар бастакы түһүмэҕэ буолар. Быйыл тустаах министиэристибэ ситиһиитэ үгүс. Онтон улахана Дойду таһымнаах экологическай грааны ылары ситиһии буолар. Ол чэрчитинэн кыыл табалар, кыталыктар уонна чубукулар үөрэтилэллэр.
Онтон бүгүҥҥү тэрээһин сүрүн -сыала соруга идэни талыыга туһуланар. Оскуола саастарыттан айылҕаны харыстыырга үөрэтиибит таах хаалыа суога диэн Өрөспүүбүлүкэ бастыҥ оскуола лесничествотын салайааччы Айталина Чичигинарова санаатын үллэстэр.
Айталина Чичигинарова, хамаанда салайааччыта: «Кыра эрдэхтэриттэн бэйэлэрин дойдуларын таптыырга, ураты сыһыаны иҥэрэ сатыыбыт. Экология - олохпут барыта. Онон кинилэр ыраас, чэбдик уонна үчүгэй өйдөөх-санаалаах сайдыылаах дьон тахсалларыгар эрэллээхпит».
Күн бүгүн Саха сирин үрдүнэн 27 оскуола лесничестволара үлэлии-хамсыы сылдьаллар. Хамсааһын үлэтэ Өрөспүүбүлүкэ үрдүнэн киэҥ далааһыннаахтык барар.
Сахалина Ефремова, тэрийэр бөлөх чилиэнэ: «60-ча оҕо, 10 салайааччы кэллэ. Кэлэн бэйэбит үлэбитин, тугу гынарбытын кэпсээтибит. Экология министиэристибэтин кытта үлэлиир тэрилтэлэр бары кэлэн үлэбит туһунан маастар-кылаас оҥордубут уонна оонньуу оонньото сылдьабыт оҕолорго».
Салгыы 2 күнү быһа экология министиэристбэтэ сыл түмүктүүр тэрээһиннэрэ ыытылла туруохтара. Тэрээһин пленарнай мунньаҕынан түмүктэниэҕэ.