Бүлүү улууһун Тааһаҕар нэһилиэгэр "Эйгэ" норуот айымньытын дьиэтэ национальнай бырайыагынан тутуллан киирбитэ

10 декабря в 11:58 51

Дьээбэ-хообо, киһи быарын тарбыыр дьүһүйүү сыанаҕа оонньонор. Онтон бу "Эгэлгэ" көр-күлүү норуот тыйаатырын артыыстара бэлэмнэнии үөһүгэр сылдьаллар. 2012 сыллаахха Тааһаҕарага норуодунай тыйаатыр үлэтин саҕалаабыта. Билигин манна 21 улахан дьон уонна 16 оҕо артыыс быһыытынан буһа-хата сылдьаллар.

Михаил Шамаев, "Эйгэ" норуот аймньытын дьиэтин режиссёра: «Биһиги үксэ күлүүлээх репертуар туруора сатыыбыт. Атын улуустарга күрэхтэһиилэргэ кыттабыт».

2022 сыллаахха национальнай бырайыак чэрчитинэн нэһилиэккэ баараҕай тутуу - култуура дыбарыаһа үлэҕэ киирэр. Манна билигин 20-чэ холбоһуктар, түмсүүлэр үлэлииллэр. Аныгы олох тэтиминэн "Экстра Синема" киинэ тыйаатыра нэһилиэк олоҕун сэргэхситэр.

Клавдия Петрова, "Эйгэ" норуот айымньытын дьиэтин дириэктэрэ, СӨ култууратын үтүөлээх үлэһитэ: «Сүүс сылбытын туолан бу үчүгэй, кыраһыабай уораҕайга киирэрбитигэр култуура министиэристибэтэ "Экстра Синема" киинэтин саалатын бэлэхтээбитэ. Онон, туох баар өрөспүүбүлүкэҕэ көстөр саха киинэлэрин биир күн көрөбүт».

Ырыа тойук аргыстаах манна үс вокальнай түмсүү үлэлиир. Ону барытын салайан, иилээн-саҕалаан үөрэтэр Христина Осипова. Маныаха кини кулууп түмсүүлэрин салайар сүрүн киһи буолар. Улуус, Өрөспүүбүлүкэ таһымнаах куонкурустарга үгүс ситиһии көтөлө кэлэ турар.

Христина Осипова, "Эйгэ" норуот айымньытын дьиэтин сүрүннүүр исписэлииһэ: «Оҕолорго олоҥхону үөрэтэбин уонна ырыаҕа уһуйабын. Икки бөлөхтөөхпүн. Улахан дьоҥҥо эмиэ ырыа ансаамбыллаахпын».

Үҥкүүһүттэр манна эмиэ үгүстэр. Имигэстик хамсанан Тааһаҕар кэрэ аҥардара сыананы киэргэтэллэр. Хореография барыта өрүтун арыйаллар.

Мария Васильева, "Эйгэ" норуот айымньытын дьиэтин үҥкүүгэ салайааччыта, СӨ култууратын туйгуна: «Кыра оҕолортон улахан дьоҥҥо дылы кэлэктииптэрдээхпин. Уопсай 50 тахса киһини үөрэтэбин. Элбэх ситиһиилэрдээхпит».

Култуура дыбарыаһа Бүлүү улууһугар бастакылар кэккэлэригэр национальнай бырайыагынан тутуллан олоххо киирбитэ. Өссө да сайдар кэскиллээх үлэлиир соруктаах.