АГАТУ устудьуоннара байыастарга бэйэ аһын ыыппыттара үһүс сыла буолла

Бу курдук устудьуоннар хас биирди кус түүтүттэн ыраастаан, сууйан, суулаан анал байыаннай дьайыы кыттыылаахтарыгар ыытаары бэлэмнииллэр. Байыастар төрөөбүт дойду бэйэ аһын ахтыбыттара буолуо диэн санаанан салайтаран устудьуоннар сарсыардаттан үлэлии-хамсыы сылдьаллар. 

Айаана Скрябина, Арктикатааҕы Судаарыстыбаннай агротехнологическай университет 2-с кууруһун устудьуона: «Ыарахана суох. Кыра түү хаалбыт буоллаҕына уокка сиэтэбит».

Усудьуоннар хас да бөлөҕүнэн арахсан биир ситимнээхтик үлэлииллэр. Куһу-хааһы, балыгы ыраастан бэлэмнээбиттэрин кэннэ, ас өр хараллан тиийэрин гына анал сууга уган, тоҥороллор.

Урсун Красильников, Арктикатааҕы Судаарыстыбаннай агротехнологическай университет 4-с кууруһун устудьуона: «Кээмэйинэн угабын, ыйыыбыт уонна тэҥнии ууран баран вакуумнуубут».

Арктикатааҕы агротехнологическай университет устудьуоннара байыастарга ас астаан, бэлэмнээн ыыппыттара үһүс сылыгар барда. Ол курдук бурдук араас аһын, собо, кус-хаас, түргэнник буһарыллар бэлэм аһы бэлэмнииллэр. 

Наталья Яковлева, АГАТУ иһинэн технология уонна салайыы колледжын дириэктэрэ: «Оҕолорбут бу үлэни сүрдээҕин кыһаллан оҥороллор. Кинилэр наһаа эппиэтинэстээхтэр. Аймахтара СВОҕа сылдьар киһи элбэх, ол иһин биир да оҕо аккаастаммакка актыыбынайдык үлэлииллэр».

Манна Өрөспүүбүлүкэ улуустара бары ас аҕалан туттараллар. Бу сырыыга Бүлүү улууһун Лөкөчөөннөрө алта куул аһы ыыппыттар. Түөрт куул собо, икки куул куус уонна хаас.

Акулина Комлева төрдүс кууруска үөрэнэр. Үөрэхпит быыһыгар бииргэ үөрэнэр оҕолорбун кытта куруук кэлэн көмөлөһөбүт, хаһан да туора турбаппыт. Байыастар бэйэ дойду аһын аһаан, доруобуйалара түргэнник чөлүгэр түһүө диэн эрэнэр.

Акулина Комлёва, Арктикатааҕы Судаарыстыбаннай агротехнологическай университет 4-с кууруһун устудьуона: «Үчүгэй дьыала оҥоробут дии саныыбын. Ыраах сылдьар киһиэхэ бэйэ аһын сиэн санаалара көтөҕүллэрэ буолуо дии саныыбын».

Устудьуоннар кыһаллан бэлэмнээбит астара бу күннэргэ байыастарга айанныаҕа. Бу сыллар устата Арктикатааҕы судаарыстыбаннай агротехнологическэй университет барыта 3,5 туоннаттан тахса аһы ыытта.