Бүтүн Арассыыйатааҕы "Сыл бастыҥ учуутала - 2025" күрэх Саха сиринээҕи түһүмэҕэ саҕаланна

Сыл бастыҥ учуутала. Үөрэх эйгэтин үлэһиттэригэр саамай күүтүүлээх, биир бастыҥ күрэхтэрэ саҕаланна. Бу күрэххэ учууталлар сыл саҕаланыаҕыттан бэлэмнэнэллэр. Чурапчы улууһуттан сылдьар Юлия Макарова омук тылын учуутала. Тус бэйэбэр бу күрэх олус суолталаах. Үлэлиир үөрэх кыһам быйыл үбүлүөйдээх 30-с сыла, онон олох эппиэтинэстээх диэн этэр.

Юлия Макарова, С.К. Макаров аатынан Чурапчы гимназиятын омук тылын учуутала: «Бэлэмнэнии ааста. Кыахпынан кыттан көрүөм. Бэйэбэр эрэллээхпин. Учууталлар мустаммыт уопут атастаһабыт, саҥаҕа үөрэнэбит, бэйэбитин көрдөрөбүт. Улахан суолталаах тэрээһин».

Кини күрэххэ олох эрдэттэн бэлэмнэнэн, анаан-минээн халыын хамаандалаах кэлбит. Бииргэ үлэлиир Сардаана Гоголева дьүөгэтигэр күүс-көмө өйөбүл буолар.

Сардаана Гоголева, С.К. Макаров аатынан Чурапчы гимназиятын саха тылын уонна литературатын учуутала: «Элбэх бэлэмнэнии ааста. Кыыспыт билиитэ-көрүүтэ киэҥ».

Быйылгы күрэххэ Өрөспүүбүлүкэ араас улууһуттан 20 бастыҥ учуутал кыттыыны ылар. Бу күннэр устата учууталлар бэйэлэрин билиилэрин, сатабылларын көрдөрүөхтэрэ. Сылын аайы күрэх кыттааччыта элбиир, саҥа түһүмэхтэр эбиллэн иһэллэр.

Елизавета Яковлева, СӨ үөрэҕириини сайыннарар уонна идэ таһымын үрдэтэр институт преподавателэ: «Быйылгыттан атын түһүмэх киирдэ. Манна учуутал бэйэтэ талаанын көрдөрүөҕэ».

Уус Алдан улууһуттан сылдьар Никита Ховров маннык үрдүк таһымнаах күрэххэ аан бастакытын кыттар. Кыттааччылар бары күүстээхтэх, күрэххэ олус бэлэмнээхтэр диэн этэр.

Никита Ховров, Уус Алдан улууһун Курбуһах орто оскуолатын биология уонна химия учуутала: «Уруокпар бэлэммин. Ааспыт нэдиэлэҕэ темабытын биэрбиттэрэ. Маастар-кылааска эрдэттэн бэлэмнээхпин».

Бүлүү улууһуттан сылдьар Марина Прибылых география учуутала. Кини бу күрэх эрэ буолбакка, уопут атастаһыы, саҥа дьону кытта билсии буолар диэн этэр. Эдэр учуутал үөрэх эйгэтигэр үлэлээбитэ бэһис сыла.

Марина Прибылых, Г.И. Чиряев аатынан Бүлүүтээҕи 1-кы нүөмэрдээх орто оскуолатын география учуутала: «Билиҥҥи учуутал оҕолору кытта биир ситимнээхтик үлэлиэхтээх. Уопсай тыл булан оҕону сайыннарабыт».

Бүгүҥҥүттэн саҕалаан учууталлар бэйэлэрин билиилэрин, уопуттарын көрдөрүөхтэрэ. Аһаҕас уруоктар, маастар-кылаастар уонна да атын түһүмэхтэр бу нэдиэлэ устата ыытыллыахтара. Сыл бастыҥ учуутал аатын бу бээтиниссэҕэ билиэхпит.