Тымныы кэмигэр суһал сулууспалар үрдүк бэлэмнээх олороллор

Быыһыыр сулууспа пультугар ыҥырыы киирээтин кытта бэлэм олорор биригээдэ тута көмөҕө турунар. Кыһыҥҥы тымныы кэмҥэ айан суолугар массыына саахалын, эбэтэр алдьаныытын, өрүскэ массыына түһүүтүн түгэннэрэ буолаллар. Вадим Винокуров быыһыыр сулууспа аэромобильнай быыһааччыта, үлэлээбитэ 3 сыла. Бу кэм тухары араас ыксаллаах түгэннэргэ сылдьар уопуттаах быыһааччы. 

Вадим Винокуров, СӨ быыһыыр сулууспа аэромобильнай быыһааччыта: "Суол саахала буолар түгэнигэр үнүстүрүмүөннэрбит бэлэм, бу манна сыталлар. Ол курдук массыына аанын аһар тэриллэр, эчэйии баар буоллаҕына туһаларга наһыылкалаахпыт". 

Быыһааччыларга сүрүн сыал-сорук - киһи олоҕо. Кинилэр төгүрүк суукка устата араас тахсар ыксаллаах түгэннэргэ бастакынан кэлэллэр. Куорат эргин сүрүннээн полициялары кытта тэҥҥэ үлэлииллэр. Ол курдук хатаммыт ааны арыйыы, итиэннэ дьиэ тоҥуута билиҥҥи кыһыҥҥы өттүгэр сотору-сотору тахсар. Ыраах айаҥҥа массыына алдьанар, дьон тоҥор, үлүйүү тахсар түгэннэригэр бастакы көмөнү кинилэр оҥороллор. 

Пётр Степанов, СӨ быыһыыр сулууспа 3№ симиэнэтин старшайа: “Күүскэ тоҥмут киһини сылаас сиргэ киллэриэххэ наада. Ол эрэн үлүппүт сирдэрин бүрүйэн эрэ баран. Өйүгэр сылдьар буоллаҕына сылаас чэй иһэрдиэххэ сөп. Оттон күүскэ үлүйбүт буоллаҕына тута быраастары ыҥырар тоҕоостоох". 

Маны тэҥэ улахан тымныыларга баһаар тахсар куттала улахан. Ордук чааһынай дьиэҕэ, гаражка уот турар түгэнэ элбэх. Элбэх квартиралаах олорор дьиэлэргэ эмиэ баһаартан сэрэхтээх буолуу хайаан да ирдэнэр.

Ким Кузьмин, Дьокуускайдааҕы кэтээн көрөр салаа инспиэктэрэ: "Баһаар тахсыытын сүрүн төрүөтэ уот ситимэ. Уокка холбонор тэриллэртэн хатыһыы тахсар". 

Тымныы күннэргэ  суолга-иискэ суоппардары, сатыы сылдьааччылары бэрт сэрэхтээх буоларга ыҥыраллар. Маныаха улахан айан суолларыгар бу күннэргэ киһи өлүүлээх быһылааннар таҕыстылар. Ахсынньы 2 күнүттэн 20-гэр диэри суолга-иискэ айан хонтуруола күүһүрдэ.

Кюннэй Иванова, Госавтоинспекция салалтатын аналитическай үлэҕэ уонна суолга-иискэ куттал суох буолуутугар салаатын салайааччытын солбуйааччы: "Ыраах айаҥҥа турунар буоллаххытына тимир көлөҕүт техническэй туругун көрүнүөххүтүн наада. Айаҥҥа сылаас хаатыҥка, ичигэс таҥас, сылаас ас ыларгытын сүбэлиибит итиэннэ дьоҥҥутун кытта сибээскэ сылдьыаххытын наада. Госавтоинспекция үлэһиттэрэ көмөлөһөргө бэлэмнэр".  

Онон тымныы кэмҥэ хас биирдии киһи бэрт сэрэхтээх, болҕомтолоох буолара наада.