Бүлүү Тааһаҕарыгар ыччат тыа хаһаайыстыбатын ылсар
Тааһаҕар нэһилиэгин эдэр ыччата, элбэх оҕолоох аҕа Евгений Потапов кыһыны баттаһа саҥа хотонун малааһынын тэрийэн, үлэ үөһүгэр сылдьар. Хаһаайыстыба этэҥҥэ кытсыкка киирдэ.
"Потапов” бааһынай хаһаайыстыбаҕа уопсайа хороҕор муостаах кыстаан турар. Билигин манна 21 ынах ыана турар”, - Анастасия Добрянцева, корреспондент.
Евгений Потапов, хаһаайыстыба салайааччыта: "Тыыпмы” хаһаайыстыбаттан кыһыл эриэн 8 боруоданы атыылаһан аҕалбытым. Бэйэм ынахтарым нэһилиэкпиттэн хомуллубут буоллахтара дии. Онон 2,5 туоннаны биэрэллэр. Оттон кыһыл эриэннэртэн 3-4 туоннаны ыахтаахпын. Мин үүккэ охто сатыыбын".
Саҥа хотон Бүлүү улууһугар эдэр фермердэри өйөөһүн бырагырааманан итиэннэ Тааһаҕар нэһилиэгин аҕа баһылыгын өйөбүлүнэн үлэҕэ киирдэ. Евгений Потапов бырагырааманан көрүллүбүт 4 мөлүйүөн солкуобайга бэйэтин 1 мөлүйүөн солкуобайын эбэн эбийиэги туппут.
Семен Каратев, "Тааһаҕар" МТ баһылыга: "Улуус көмөлөспүтэ. Онтон бэйэлэр кыттыһан оттооннор, тиэхиньикэлэринэн көмөлөсүһэн үчүгэй баҕайытык билигин үлэлии сылдьаллар. Быйыл атырдьах ыйыгар от үчүчгэйдик үүнэн, кыстыыр оппутун бэлэмнээтибит".
Быйылгы отун былаанын, ол эбэтэр 92 туонна оту уонна сенаж 8 туонна толорбут. Салгыы хаьаайыстыбатын кэҥэтэр соруктаах.
Евгений Потапов, хаһаайыстыба салайааччыта:"Нэһилиэгим аттыгар сөптөөх сир көрө сылдьабын, 5 гектар иэннээх сири. Инникитин биэс сыл иһигэр онно 120 миэстэлээх хотон туттуом диэн былаанныыбын".
Онтон манна даҕатан этэр эбит буоллахха, өрөспүүбүлүкэ үрдүнэн кыстык эриэ дэхси саҕаланна. Билигин хоту улуустарга уустук кыстык бара турарын тустаах министиэристибэ иһитиннэрэр.
Василий Бессонов, СӨ ТХМ кыылы-сүөлү иитии салааларын, племенной үлэни, кээпэрээссийэни уонна дьоҕус киэптээх хаһаайыстыбалары сайыннарыыга департаменын салайааччы: "Биһиэхэ хоту улуустарга ыарахан балаһыанньа үөскээбитэ. Халыҥ хаар түһэн сылгылары эрдэ аһылыкка киллэртээбиттэрэ. Ол курдук Муома, Абый, Эбээн бытантай, дьааҥы улуустарыгар. Ити улуустары кытта нэдиэлэҕэ биирдэ нэһилиэк, улуус баһылыктарын кытта кэпсэтэбит".
Маныаха Өймөкөөн улууһугар эмиэ балаьыанньа соччото суох, онон билигин болҕомто барыта тустаах оройуоннарга туһуланар.