Халлаан тымныйара күүтүллэр
"Сэтинньигэ сылаас күн-дьыл турбута, оттон ахсынньы үгүс улуустарга тымныыттан саҕаланна. Ол курдук ааспыт өрөбүлгэ Хотскай куораттан сис былыт кэлэн хоту улуустарга тымныйда, 50 тахса кыраадыска түһэ сырытта. Оттон бу күннэргэ үгүс улуустарга тыаллаах-куустаах, хаардаах буолуо”, - Татьяна Николаева, корреспондент.
Саха сирин соҕуруулуу-илин өттүгэр хаардаах күн-дьыл турар. Оттон соҕуруу диэки сөкүүндэҕэ 15-20 миэтэрэҕэ диэри тиийэр тыаллаах. Түүҥҥү температура хоту улуустарга 48-53 кыраадыска тиийэр, соҕуруу 35 диэри, онтон соҕуруулуу-илин 30 кыраадыска диэри тымныы. Быйыл Хатас-Павловскай хайысханан өрүһүнэн суол арыллыыта нэдиэлэ курдугунан эрдэлээтэ. Билигин бу хайысханан 5 туоннаҕа диэри ыйааһыннаах транспорт айанныыра көҥүллэнэр.
Саргылаана Никитина, Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: "Ааспыт өрөбүл күннэргэ антициклон туран тымныйда. Онтон Охотскай муораттан сис былыт кэлэн Уус Майаҕа Югоренок диэн метео ыстаансыйаҕа күүстээх тыал түстэ. Бу нэдиэлэҕэ соҕуруулуу-илин Халыма-Индигир былыттаах буолуо, хаардыа. Үгүс оройуоннарга тымныы күн-дьыл туруо"
Тымныы күннэр үүнэн суолга-иискэ суоппардары, сатыы сылдьааччылары бэрт сэрэхтээх буоларга ыҥыраллар. Маныаха ааспыт өрөбүл күннэргэ өрөспүүбүлүкэ суолларыгар уопсайа 26 суол быһылаана тахсыбытын түмүгэр 5 киһи эчэйдэ, ол иһигэр 1 оҕо. Ахсынньы 2 күнүттэн 20-гэр диэри суолга-иискэ айан хонтуруола күүһүрүөҕэ.
Кюннэй Иванова - Госавтоинспекция салалтатын аналитическай үлэҕэ уонна суолга-иискэ куттал суох буолуутугар салаатын начальнигын солбуйааччы: "Мантан ыла тымныы өссө күүһүрүө, ону тэҥэ тумаммыт хойдуоҕа. Ону сэргэ Саҥа Дьылбыт чугаһаан иһэринэн сибээстээн суолга-иискэ сэрэхтээх буоларгытыгар ыҥырабыт. Билигин ыраах айаҥҥа турунар буоллаххытына тимир көлөҕүт техническэй туругун көрүнүөххүтүн наада".
Оттон былыргы итэҕэлинэн ахынньыга сөҥүүтэ суох буоллаҕына, эмиэ оннук саас, сайын турар. Оттон тымныы, хаардаах, сотору-сотору тыаллаах, кырыалаах буоллаҕына - үчүгэй үүнүү күүтүллэр. Ый саҥатын диэки былыр аам-даам туманнаах тымныы түһэр эбит. Бу тымныы тохсунньуга диэри салҕанара.