Саха быраастара кулгаахха уустук эпэрээссийэлэри оҥорор кыахтаннылар

Россияҕа биллэр профессор, элбэх эмчиттэри иитэн таһаарбыт Сергей Косяков бу 3 эпэрээссийэтин ыытаары бэлэмнэнэр. Пациент орто саастаах дьахтар, дьарха буолбут отит диагностаах. Кулгааҕар истибэтинэн эрдэ протез олорпуттара үчүгэйдик үлэлээбэт буолан, хос уларытан оҥорон биэриэхтэрэ. Сергей Яковлевич бэрт холкутук олохтоох ЛОР-быраастарга барытын көрдөрөн, өйдөтөн эпэрээссийэ ыытар. Россиятааҕы медицинскэй академия кафедратын кытта бу өрөспүүбүлүкэтээҕи 2 №-дээх балыыһа 2009 сылтан бииргэ үлэлэһэллэр.  

Сергей Косяков, РФ медицинскэй академиятын оториноларингологияҕа кафедратын сэбиэдиссэйэ, профессор: "Бу маастар-кылааһы таһынан, биһиги Саха сирин кытта бииргэ үлэлэспиппит быданнаата. Биһиэхэ Саха сириттэн ординатураларын баралаллар, таһымнарын үрдэтэр куурустарга үөрэлэннэр. Билигин 20 быраас бу  салааҕа туох саҥа ньымалар баалларын, саҥа сүүрээннэр киирбиттэрин туһунан биһиги лекцияларбытын истэллэр. Бу эстэнээччи туругун тупсарыыга барыта туһуланар".

Эпэрээссийэни профессор саҥа кэлбит микроскоп уонна бор-машина оборуудабанньа көмөтүнэн оҥорор. Бу оборуудабанньа балыыһа материальнай-техническэй базатын саҥардар, тупсарар инниттэн ылан үлэҕэ киллэрдэ. Оччотугар чуолаан, кулгаах микрохирургията саҥа таһымҥа тахсан пациеннарга уустук эпэрээссйиэлэри ыытар кыах улаатан, кэҥээн биэрэр. 

Иннокентий Александров, СӨ 2№-дээх балыыһатын ЛОР салаатын сэбиэдиссэйэ: "Саҥа оборуудабанньа кэллэ. Ол аата анал микроскоп. Ону таһынан бормашина ыллыбыт. Бу тэриллэри туһанан үлэбит өссө сайдыаҕа". 

Өрөспүүбүлүкэтээҕи 2 №-дээх балыыһа оторино-ларино-гологическай салаата Саха сиригэр соҕотох улахан дьон ЛОР уорганнарын ыарыыларын эмтиир салаа буолар. Салаа 8 палатанан 30 куойка-миэстэлээх. Саамай тэнийбит ыарыыларынан отит, синусит, искэҥ ыарыылара буолаллар.

Наталья Лебедева, СӨ кылаабынай оториноларинголога: "Саха сиригэр кулгаах ыарыыта элбэх. Дойду көрдөрүүтүн кытта тэҥнээтэххэ түөрт төгүл элбэх. Оҕолор ыалдьаллара элбэх. Үчүгэйдик эмтэммэтэх  оҕолор ыарыылара дьарҕаҕа кубулуйар. Ол минингит, мэйии ириҥэриитэ курдук сэтэрээһиннэргэ тириэрдиэн сөп".

ЛОР салааҕа исписэлиистэринэн хааччыллыы тэрээһиннээхтик ыытыллар. Ол курдук сыл ахсын 200 быраас тустаах үөрэҕи, идэ таһымын үрдэтиини ааһар.

Саҥа тэрилинэн хааччыллыы барар буолан салаа үлэтэ, оҥоһуллар өҥө хаачыстыбата сыллата тупсан, сайдан иһэр.