Кэлэр үс сылга Арктика улуустарын түргэн интернеккэ холбооһун тэтимнээхтик барыа

Федеральнай сыыппара пуорума быйыл төрдүс төгүлүн ыытыллар. Сылын аайы бу пуорум дойду араас регионнарыттан, тас дойдуттан кыттааччыны биир сиргэ түмэр. 

Пуорум үс күн устата хас да былаһаакканан ыытыллынна. Манна уопуттаах, бөдөҥ тэрилтэлэртэн саҕалаан, саҥа саҕалааччыларга тиийэ кыттыыны ыллылар. Араас хайысхаҕа бырайыактарын билиһиннэрдилэр, үгүс киһи болҕомтотун тартылар.

(Нарыйаана Стручкова, "Цифровой алмаз" пуорум кыттаччыта: "Биһиги бырайыакпыт куорат суолларын оҥоһуу өй көмөтүнэн эридьиэстиир. Дьон сэҥээрдэ, элбэх киһи кэлэн ыйытта. Бөлөхпүтүгэр үрдүк таһымнаах программистар үлэлииллэр".

Бу пуоруму саҕаланыаҕыттан көтүппэт, "IT Park” резидиэннэрэ  ыалдьыттарга олоххо киллэрбит итиэннэ саҥа бырайыактарын билиһиннэрдилэр. Тэрилтэ доруобуйа харыстабылын эйгэтигэр туһалаах бырагыраамалары айан оҥорон таһаарар. Өрөспүүбүлүкэҕэ эрэ буолбакка, дойду регионнарын кытта бииргэ үлэлэһэр.

Илья Чыбыев, "Цифровой алмаз" пуорум кыттаччыта: "Түөс искэҥин быһаарар бырагырааманы оҥордубут. Медицинскэй тэриллэри оҥорууга көҥүл ыллыбыт. Түөс искэҥин быһаарар бырагыраамабытын эһиил регистрациялыыбыт".

Бу күннэр устата аһаҕас кэпсэтиилэр, төгүрүк остуоллар, маастар-кылаастар ыытыллыннылар. Араас хайысхаҕа үлэлиир тустаах тэрилтэлэр бэйэлэрин саҥа көрүүлэрин, этиилэрин эттилэр, уопут атастастылар.

Павел Степанов, "Цифровой алмаз" пуорум кыттаччыта: "Пилота суох көтөр аалларга өрөспүүбүлүкэҕэ улахан интэриэс баарын бэлиэтии көрдүм. Ону тэҥэ бүгүн биһиги спутник сибээһин уонна спутнигынан сири чинчийиини туһунан ырытыстыбыт". 

Пуорум кэмигэр "Синергия Арктики" бөдөҥ бырайыак олоххо киирдэ. Бу бырайыак өрөспүүбүлүкэ Арктическай оройуоннарыгар оптика ситимин бөҕөргөтүө, 3 сыл иһигэр Арктика бары улуустарын кииннэрэ түргэн интерниэккэ холбонуохтааҕын   Ил Дархан Айсен Николаев эттэ.

Айсен Николаев, СӨ Ил Дархан: "Үс сыл устата 7000м аптоволокно ууруллуо. Арктика 61 нэһилиэгэ бу бырыйыахха хапсыа. Ол аата 50 тыһыынча хоту сир дьоно түргэн интернеккэ холбонуохтара. Бу киэҥ далааһыннаах бырайыак Илин өттүттэн Чукотканы уонна  Хотугу муора суолун кытта төгүрүтэбит".

Саха Сирэ Уһук Илин уокуругар айти хайысхатыгар инники күөҥҥэ сылдьар. Оттон маннык ыытыллар пуорумнар саҥа көрүүлэри, саҥа бырайыактар олоххо киирэллэригэр төһүү күүс буолар. Бу тэрээһин өрөспүүбүлүкэҕэ айти эйгэ сайдан иһэрин өссө биирдэ бигэргэттэ.