Саха сирин үрдүнэн олоҥхону уруйдаан аналлаах тэрээһиннэр ааһаллар

Олоҥхо күннэрэ Тааһаҕарга орто оскуолаттан саҕаланна. Нэһилиэк Күбэйэ эбээлэр түмсүү уран тарбахтааҕа Мария Иннокентьевна оскуола кэрэ аҥар үөрэнээччилэригэр ситии хатыытыгар маастар-кылааһын ыытта. Онтон бу тэрээһин "Туску" олоҥхо педагогикатын бырагырааматыгар олоҕуран тэрилиннэ.

Мария Попова, "Олоҥхо олуга" методическай холбоһук салайааччыта: «Биһиги оскуолабыт 2000 сыллартан саҕалаан норуоппут үгэһин тарҕатар үлэтин түмүгүн 2016 сыллаахха түмэн баран “Туску” диэн бырагырааманы суруйбуппут. 2023 сылтан олоххо киирэн үлэлии сылдьабыт. Уонна “Эркээйи эргииригэр” сөп түбэһэн киирдибит».

"Эркээйи эргиирэ" олоҥхону үөрэтэр барыл пилотнай бырайыак быһыытынан Өрөспүүбүлүкэҕэ тарбахха баттанар оскуоларга киирбитэ. Тааһаҕардар онно киирэн, үөрэх кыһатын уораҕайыгар бүтүн анал сир бэриллибитэ. Манна улуу эпоспытыгар анаммыт дьарыктар, үөрэхтэр, кэпсэтиилэр, маастар-кылаастар, быыстапкалар ыытыллаллар. Бу барылынан Тааһаҕар кыраччааннара эмиэ иитиллэн тахсаллар.

Уһуйаан 1,5 саастарыттан саҕалаан оҕолору номнуо хомоҕой тыллаах олоҥхо эйгэтигэр сыһыарар. Манна анаан дидактическай матырыйааллар оҥоһуллаллар. Холобура, Үс дойдуну ситимниир Аал Луук мас оҕо саадыгар бас-көс миэстэни ылар. Билигин уһуйааҥҥа бу хайысхаҕа эмиэ араас тэрээһиннэр ыытыллаллар.

Лариса Осипова, "Мичээр" оҕо уһуйаанын сүрүн иитээччитэ: «Олоҥхо декадата буола турар. Ол иһин оҕолорбут олоҥхону үөрэтэллэр. Оҕолор олоҥхоҕо сыһыаннаах оҥоһуктары оҥорон, билсэн, көрөн улааталлар».

Маны кытары Тааһаҕар норуот айымньытын дьиэтигэр эмиэ олоҥхо күннэрэ ыытыллаллар. Фольклор түмсүү иитиллээччилэрэ бу күннэргэ сыанаттан түспэттэр.

Касьян Болтунов, Н.Н.Каратаев аатынан Тааһаҕар орто оскуолатын 6 кылааһын үөрэнээччитэ: «Чуораанчык ансаамбылыгар дьарыктанабын. Олоҥхоҕо 3 саастан, чоргуйга 7 сааспыттан».

Алексей Нахов, Н.Н.Каратаев аатынан Тааһаҕар орто оскуолатын 6 кылааһын үөрэнээччитэ : «Эйгэ норуот айымньытын дьиэтигэр Чуораанчык ансаамбылыгар  чоргуйга, олоҥхоҕо уонна чабырҕахха дьарыктанабын».

Олоҥхону өрө туппут Тааһаҕарга билигин Юнеско нэһилиэстэбитигэр киирбит шедеврбыт күннэрин чэрчитинэн тэрээһиннэриттэн ураты, ымпыктаах үөрэтии, сыһыарыы үлэтэ барар.