Саха сиригэр 6-с төгүлүн ыытыллар норуоттар икки ардыларынааҕы "Хотугу форум" саҕаланна
Дьокуускай куоракка тирэхтээх сайдыы Хотугу пуорума саҕаланна. Үс күн устата спикердар, ыалдьыттар түмсэн Хоту сир уонна Арктика сайдыытын тула кэпсэтиэхтэрэ. 6-с төгүлүн ыытыллар пуорумҥа Арассыыйаттан, Аан дойдуттан барыта 170-тан тахса бэрэстэбиитил кытта кэлбит. Пуорум алта хайысханан үлэлиэҕэ, үлэ хас да былаһаакканан барыаҕа. Маны сэргэ, кыттааччылар уопут атастаһыахтара, бииргэ үлэлэһэр туһунан сүбэлэн түһэрсиэхтэрэ.
Владимир Черноградский, СӨ Арктика сайдыытын уонна хотугу норуоттар дьыалаларын миниистирэ: «Бырайыактар олоххо киирэллэр. Холобур продовольственнай безопасность бырайыагын икки сыл оҥорбуппут. Ол түмүгүнэн федеральнай сокуон үлэҕэ киирбитэ. Ону таһынан мобильнай биригээдэлэр доруобуйа харыстабылыгар эмиэ оҥоһулла сылдьыбыта».
Пуорум бастакы күнүгэр Арктикаҕа ядернай технологиялары туһаныыга, Азия тымныы регионнарыгар ирбэт тоҥ килиимэтэ, туруга уонна да атын туһааннаах кэпсэтиилэр ыытыллыннылар. Биир сүрүн кэпсэтиинэн Арктика экологиятын тула кэпсэтии буолла.
Владимир Черноградский, СӨ Арктика сайдыытын уонна хотугу норуоттар дьыалаларын миниистирэ: «Экология боппуруостара элбэхтэр. Биир улахан боппуруос – өрүстэрбитин ыраастааһына. Бу конференцияттан саҥаны күүтэбит».
Пуорум бары эйгэни киэҥник хабар. Холобура, тыраанспар хайысхатынан эмиэ элбэх үлэ ыытылла турар. Тустаах министиэристибэ бэйэтин көрүүтүн, уопут билиһиннэрдэ. Эһиил "Экология" нациоанльнай бырайыак чэрчитинэн Тиксии пуордугар ыраастааһын үлэтэ ыытыллыахтаах, былаан 2030 сылга диэри оҥоһуллан, бигэргитиллэн турар.
Семён Коркин, СӨ тыраанспар миниистирин солбуйааччы: «Тиксии муора пуордун ыраастааһына буолар. 12 суудунаны хостуохтаахпыт бухтаттан. Былаанынан 2030 сыллаахха бүтэриэхтээхпит».
Бүгүн улахан далааһыннаах форум иккис күнэ. Пленарнай мунньах уонна пуорум үөрүүлээх арыллыыта буолуоҕа. Арктика уонна хоту улууһун дьоно-сэргэтэ күн бүгүн кыһалҕалаах түгэннэрин уонна сайдар кэскиллэрин торумнуур пуорум сэтинньи 28 күнүгэр диэри буолуоҕа.