Тыа хаһаайыстыбатыгар үлэлии-хамсыы сылдьар дьахталлар түмсэллэр

Бүлүү улууһун олохтооҕо Анастасия Кырбасова кэргэнинээн бааһынай хаһаайыстыба тэринэн үлэлээбиттэрэ 35 сыл буолла. Анастасия Васильевна дьалхааннах 90-с сыллар уустуктарын аһардан, атахтарыгар туран, билигин 300-кэ кэриҥэ ынах-сүөһүнү, оҥорон таһаарар кээпэрэтииби, маҕаһыыны дьиэ кэргэнинэн көрөн-истэн олороллор. 6 оҕолоох ийэ, 20 сиэн эбэтэ Анастасия Васильевна Саха сирин тыатын хаһаайыстыбатыгар тарбахха баттанар баай уопуттаах салайааччы быһыытынан биллэр.

Анастасия Кырбасова, бааһынай хаһаайыстыба салайаччыта, Бүлүү улууһа: «Тыа сиригэр үлэлии кэлиҥ. Сибиэһэй ас барыта үрдүттэн. Сибиэһэй салгыҥҥа сылдьыаххыт, оҕолоргутун үлэҕэ үөрэтиэххит диэн ыҥырабын».

Тыа хаһаайыстыбатын эйгэтигэр үлэлии-хамсыы сылдьар дьахталлары өйүүр, чиэстиир сыаллаах маннык тэрээһини олоххо 2018 сыллаахтан киллэрбиттэрэ. Ол кэмтэн ыла сыл ахсын ыраах-чугас улуустартан бааһынай хаһаайыстыба, тыа хаһаайыстыбатын кээпэрэтииптэригэр үлэлиир ийэлэри, далбар хотуттары киин куоракка ыҥыран чиэстииллэр.

Татьяна Осипова, СӨ ааҕар-суоттуур палата аудитора: «Тыа сиригэр олорор дьахталлары өйүүргэ, кинилэр үлэлэрин, ситиһиилэрин сырдатарга диэн сыаллаах саҕалаабыппыт».

Томпо улууһун Кириэс Халдьаайы нэһилиэгин олохтоҕо Светлана Охлопкова эмиэ дьиэ кэргэнинэн бааһынай хаһаайыстыбанан дьарыктаммыттара уонтан тахса сыл буолла. Тыа хаһаайыстабытыгар чуолаан хоту сиргэ төһө да уустуктар баалларын аахсыбакка үлэлии-хамсыы сылдьаллар.

Светлана Охлопкова, бааһынай хаһаайыстыба салайааччыта, Томпо улууһа: «Оттуур сирбит суоҕа биһи саамай улахан проблемабыт. Сыл аайы от атыылаһабыт. Быйыл сирбит арыый үүннэ. Сыл аайы 5 мөл. курдукка от ылан тастарар буоллахпытына, быйыл арыый аччыгый».

Саха сиригэр бааһынай уонна тыа хаһаайыстыбатын кэпэрэтиибин Ассоциацията тэриллибитэ эһиил 35 сылын бэлиэтиэҕэ.

Зарема Бочкарёва, СӨ бааһынай уонна тыа хаһаайыстыбатын кооперативтарын түмсүүтүн толорооччу дириэктэрэ: «Өрөспүүбүлүкэ үрдүнэн 2800 игин бааһынай хаһаайыстыба баар буоллаҕына, итинтэн Минсельхозка отчуот оҥорооччута уонна судаарыстыбыннай көмө ылааччыта 1500 курдук буолар. Онтон дьахтар өттө салайааччы бааһынайдар 40-50% ылабыт».

Икки күн устата мунньах кыттыылаахтара театрга кэнсиэркэ сылдьан сынньаналлар, ону тэҥэ уопсастыбыннай доруобуйа уонна профилактика киинигэр медосмотр ааһыахтара. Ону тэҥэ кинилэр анал байыаннай дьайыы байыастарыгар көмөлөһөр сыаллаах ичигэс наскы баайан, атыылаһан туттардылар.