Дьокуускайга когнитивнай кэһиилээх саастаах дьоҥҥо анаммыт устуудьуйа аһыллан үлэлиир
Сунтаар улуһуттан төрүттээх Екатерина Павлова 95 саастаах. Екатерина Федотовна 3 оҕону атаҕарар туруоран, хас даҕаны сиэн, хос сиэн эйэҕэс эбэтэ. Ытык кырдьаҕаһы бу устуудьуйаҕа кыыһа аҕалбыт. Саастаах киһи ханна барыай умнуган буолбутун бытаардаары уонна күҥҥэ дьарыктаах буоллун диэн сыалтан. Уһуннук олоруу устуудьуйатыгар 65 саастарыттан үөһээ дьон кэлэн өй-мэйии тренировкатын ааһаллар.
Екатерина Павлова, устуудьуйа кыттыылааҕа: «Дьиэҕэ таах олоруохтааҕар. Манна кэлэн сынньанабын».
Сезонунан, ол эбэтэр икки нэдиэлэ устата ортотунан 8 кырдьаҕаһы дьарыктыыллар. Ол курдук манна психолог, невролог, педагог араас хайысхалаах трениннары, дьарыктары ыыталлар. Чуолаан өй, болҕомто сайдыытыгар. Ону тэҥэ манна хас биирдии кырдьаҕас медицинскэй өйөбүлү эмиэ ылар. Устуудьуйаҕа кэлэллэригэр быраастан допуск ылан, неврологка көрдөрөн, итиэннэ психологка тест толороллоро ирдэнэр. Кырдьаҕастары манна дьонноро сарсыарда аҕалан хааллараллар уонна киэһэ өттүгэр кэлэн ылаллар.
Анна Павлова, Дьокуускай олохтооҕо: «Сарысарда тураат хаска барабыт диир. Олус сөбүлээн сырытта».
Бүгүҥҥү күҥҥэ Саха сирин үрдүнэн сүүстэн тахса киһи Альцгеймер диагностаах, ол эрээри дьон үксэ көрдөрүммэккэ сылдьар, диагноз анаан-минээн туруортарбат. Дьиҥэр барыллаан ааҕыынан 8 тыһыынча кэриҥэ бу ыарыынан ыалдьара биллэр. Уопсастыбаҕа демениция курдук ыарыы туһунан аһаҕастык кэпсэтии, үлэлэһии наада.
Наталья Каратаева, устуудьуйа салайааччыта: «Биһиэхэ “кабинет памяти” диэн оробуочай тэтэрээттээхпит. Манан күн аайы дьарыктаналлар».
Бу маннык урукку өйдөбүллэри тутуһар ньыма аҕам саастаахтарга бэрт көдьүүстээх диэн исписэлиистэр бэлиэтииллэр. Ону тэҥэ психологтар манна авторскай ньымалары тутуһан кырдьаҕастары кытта дьарыктаналлар. Икки нэдиэлэлээх дьарык бүппүтүн кэннэ онлайн арыаллааһын баар. Маны тэҥэ нейротренер диэн куурус ыыталлар. Чуолаан бу кырдьаҕастар чугас дьонноругар аналлаах. Оччотугар оҕолоро, сиэннэрэ тустаах үөрэҕи ааһан кырдьаҕаһы сөптөөх көрүүгэ-истиигэ көмө ылаллар.