Анал байыаннай дьайыыга сылдьар биир дойдулаахтарбытыгар көмөнү оҥоруу тохтообот

Бу курдук амарах санаалаах волонтердар байыастарга анаан хомуллубут гуманитарнай көмөнү ыытаары бэлэмнииллэр. Бу көмө Өрөспүүбүлүкэ хас да улууһуттан хомуллан кэлбит. Хас биирди мал байыастарга хайаан да тиийэр.

Хас биирдии Саха сирин олохтооҕо, улуус, тэрилтэлэр ким да туора турбакка көмөлөһө олорор.  Бүлүү улууһун олохтоохторо байыастарга анаан таҥас-сап, мал-сал, уолаттар дойдуларын аһын ахтыбыттара буолуо диэн бэйэ аһын, сибиэһэй эти бэлэмнээн ыыппыттар.

Харысхан Дмитриев, Бүлүү улууһун олохтооҕо: «Гуманитарнай көмө ыытаары турабыт. 700 кг тахса буолла. Эт баар, таҥас баар. Биһи эйэлээх олоххо олороммут кинилэргэ туох баарбытынан көмөлөһүөхтээхпит».

Оттон бу волонтердар ыстааптара. Манна сарсыардаттан үлэ күөстүү оргуйар. Манна сүрүннээн ийэлэр, эбээлэр кэлэн көмөлөһөллөр. Маны таһынан тэрилтэлэр, түмсүүлэр эмиэ туора турбакка нэдиэлэҕэ хаста да  кэлэн күүс-көмө буолаллар.

Күн бүгүн ыстаапка 40 тахса иистэнньэн баар. Билигин иистэнньэннэр байыастарга анаан кыһыҥҥы таҥас тигэ сылдьаллар. Маны таһынан байыастар анал сакаастарын эмиэ ылан үлэлииллэр.

Анна Ефимова, "Якутия с тобой" хамсааһын бэрэссэдээтэлэ: «Биһиги ыстааппытыгар халлаан тымныы буолан флистэн көстүүмнэри, бэргэһэлэри, кээнчэлэри тигэбит. Антах ардах игин түһэр, ол иһин плащ-палааккалары тигэбит. Билигин 114 полк көрдөһүүтүнэн 50 флис көстүүм тиктибит».

"Якутия с тобой" уопсастыбаннай ыстаап бу сыл саҕаланыаҕыттан барыта 10 тасха туонна гуманитарнай көмөнү ыытта. Күн бүгүн 900 тахса киилэ гуманитарнай көмө, бараары бэлэм. Аныгыскы гуманитарнай көмө ахсынньы маҥнайгы күннэригэр барыаҕа. Онон ким баҕалаах Якутия с тобой волонтердар ыстааптарыгар наадалаах мал-сал, ас, эмп, аҕалан туттарыан сөп.