Хатас-Павловскай хайысханан кыһыҥҥы айан суола ахсынньы ый саҥата арыллыаҕа

Үлэ уустук, куустээх илии ирдэнэр. Бу курдук улахан муустары үлтүрүтэн, кыдьымахтан ыраастыыллар.

Хатас-Павловскай хайысханан кыһыҥҥы суолу оҥорууга күргүөмнээх үлэ ыытыллар. Бэдэрээччит тэрилтэ сарсыардаттан күнүскү күн сырдыгы баттаһа тэтимнээхтик  хамсанар. 

Александр Данилов, СӨ транспорт уонна суол хаһаайыстыбатын министиэристибэтин суол сулууспатын департаменын салайааччыта: «Бэдэрээччит кыдьымах мууһун ыраастыыр үлэтин бүтэрдэ. Билигин пуомпанан уу кутан мууһу халыҥата сылдьаллар. Бүгүҥҥү күҥҥэ 20-чэ киһи үлэлии сылдьар».

Илии үлэтин таһынан көмөҕө биллэн турар күүстээх тиэхиникэ. Бүгүҥҥү күннэ 5 араас тимир көлө  улэлиир. Сыралаах үлэ түмүгүнэн 4 тыһыынча килэмиэтиртэн аҥара бэлэм буолла. Саамай ыарахан учаастак кэллэ. Күүстээх сүүрүктээх сир буолан муус чараас, ол иһин помпанан уу ыстаран мууһу халынаталлар.

Төһөнөн муус түргэнник халыныыр да, соччонон суол арыллыытын болдьоҕо түргэтиир. Онон бу үлэлии сылдьар 20-чэ киһиттэн икки биэрэги ситимниир олох суола  быһаччы тутулуктаах.

Сергей Сметанин, Суол оҥорор тэрилтэ салайааччытын солбуйааччы: «Переправабыт уһаабыт. Фарватербыт уһуна 1,2 км, онтон биэрэккэ дылы 2,3 км буолар».

Үлэ хаамыыта хонтуролга турар. Суол тырааныспарын министиэристибэ күн ахсын кэлэн былаан туолуутун бэрэбиэркэлиир. Наада буоллаҕына туһааннаах дьонунан, тиэхиникэнэн хааччыйарга көмө буолар.

Суол арыллыытын болдьоҕо быһа барыллаан - ахсынньы саҥата. Ол эрэн манна киһи оҥорбут былааныгар  айылҕа бэйэтин уларытыыларын киллэриэн сөп.

Александр Данилов, СӨ транспорт уонна суол хаһаайыстыбатын министиэристибэтин суол сулууспатын департаменын салайааччыта: «Күһүн өр сылаас халлаан туран быйыл кыһыҥҥы суол оҥоруу үлэтэ олус ыараата. Ол гынан баран, бэдэрээччиттэр үлэлэрин үчүгэйдик оҥорон иһэллэр».

Аныгыс нэдиэлэ биллэ тымныйар диэн сабаҕалааһын баар. Оччотугар муус тоҥуута күһүрэр. Суолу оҥорооччуларга үлэ өссө уустугурар, онтон айанньыттарга хааччаҕа суох айан сырыыта саҕаланара чугаһаан биэрэр.