Анал байыаннай дьайыы кыттыылааҕа Станислав Потапов сырдык кэриэһигэр буоксаҕа турнир ыытылынна

Рингаҕа тыҥааһыннаах киирсиилэр. Үс күн устата Роман Дмитриев аатын сүгэр Олимпийскай эрэллэри бэлэмниир училищетыгар Ньурбаттан төрүттээх, училищеҕа өр сыл тренерынан үлэлээбит Станислав Потапов сырдык кэриэһигэр буоксаҕа күрэх ыытыллынна.  Онтон Станислав Семенович ийэ дойдутун көмүскэлигэр олоҕун толук уурбута.

Семён Потапов, Станислав Потапов аҕата: «Мобилизацияҕа барарыттан киэн туттар этэ. Барыахтаах барабын диир этэ. Онон кини ытык иэһин төлөөбүтэ диэн санаалаахпын».

Станислав Потапов сырдык кэриэһигэр турнир иккис төгүлүн буолан ааста. Бу күн үгэс быһыытынан кини өйдөбүнньүк мэҥэ тааһыгар сибэкки дьөрбөтүн уурдулар. Станислав Потапов сырдык мөссүөнүгэр сүгүрүйэ Ньурбаттан төрүттээх Арассыыйа Дьоруойдара, спорт бэтэрээннэрэ,  буокса бэрэстэбиитэллэрэ кэлэн элэ-была тылларын эттиллэр.  

Гаврил Мохначевский, СӨ спордун миниистирин солбуйааччы: «Дьоно-сэргэтэ, аймахтара уонна кэллиэгэлэрэ буоламмыт бу өрөспүүбүлүкэтээҕи турниры кини сырдык кэриэһигэр ыытарга быһаарыммыппыт. Быйыл иккис төгүлүн ыытылла турар».

Быйылгы күрэххэ 8 ыйааһыҥҥа 46 киилэттэн саҕалаан 80 киилэҕэ диэри киирсиилэр аастылар. 3 күннээх тыҥааһыннаах буокса түһүлгэтигэр 8 кыайыылаах кыайыы үөрүүтүн биллиллэр. Александр Иванов Станислав Потапов иитиллээччитэ 63,5 киилэҕэ бастакы миэстэни ылары ситистэ. Онтон кини быйыл Уһук Илин региоҥҥа чемпион үрдүк аатын сүкпүтэ.

Александр Иванов, күрэх кыайыылааҕа: «Бу күрэхтэһии бастакы тренерым аатыгар буола турар. 63 киилэҕэ бастаатым, былырыын эмиэ бастаабытым».

Кыайыылаахтар сыаналаах бириистэринэн наҕараадалыннылар. Станислав Потапов аймахтара күрэҕи тэрийспит дьоҥҥо махталларын тириэрдэллэр.

Анал байыаннай дьайыы кыттыылааҕа, "Эр санаа" уордьан кавалера, Саха Өрөспүүбүлүэтин физическай култуураҕа уонна спортка туйгуна Станислав Потапов аатын үйэтитэр тэрээһин хас сыл аайы үгэскэ кубулуйан ыыттылла туруоҕа.