Дьокуускайга дьону биир түһүлгэҕэ түмэр Ытык сир баар буолуоҕа

Дьокуускай куоракка күнү көрсөр түһүлгэни тутуу өссө 90-с сыллардаахха баҕа санаа быһыытынан киирбит. Икки сыллааҕыта Ытык Сир бырайыага силигэ ситэн, олохтоох дьаһалта өйөөн. Куонкурска ыыппытар, бырайыак 20-тан тахса тыһыынча куолаһы ылан, тутуу үлэтэ күһүн саҕаламмыт. Икки ый иһигэр үлэ тэтимнээхтик ыытыллан, саҥа паарка түмүктүүр түһүмэххэ киирдэ. Бу саха дьоно-сэргэтэ күүһү-уоҕу ылар, алгыстанар - Ытык Сирдэрэ буолуоҕа диэн алгысчыт Афанасий Федоров үөрэ кэпсиир.

Афанасий Фёдоров, алгысчыт: «Ханна эмэ ыраах барар буолар буоллаххына күүһү-уоҕу ылар ытык сир буолар».

Хас биирди оҥоһук барыта сиэри-туому тутуһуллан, ымпыгар-чымпыгар тиийэ оҥоһуллубут. Түһүлгэ иһигэр сэргэлэр, Дьөһөгөй оҕолоро, ортотугар Айыы алгысчыт, битииһит оҕолор - 9 уол уонна 8 кыыс, барыта 50 тахса оҥоһугу айан-тутан маастардар оҥорбуттар. 

Манна барыта 18 Саха сирин биллэр уустара, маастардара түүннэри-күнүстэри үлэлээтилэр. Таатта улууһуттан сылдьар уус Дмитрий Постников бары биир сүбэнэн, ситимнээхтик үлэлээн кэллибит диэн этэр. 

Дмитрий Постников, мас ууһа, скульптор: «Бүтэһик күннэрбитигэр утуйбакка да үлэлээтибит. Саха сирин арааһынай улуустарыттан уолаттар мустан оҥордубут».

Манна мас уустарын таһынан өссө тимир уустара үлэлэстилэр. Төһө да оҥорор бириэмэбит кылгаһын үрдүнэн, айан-тутан таһаардыбыт, үлэбит табыллынна диэн уустар кэпсииллэр.

Николай Михайлов, тимир ууһа: «Айыылар бэлиэлэрин биһиэхэ итэҕэйэн оҥотторбуттара улахан чиэс буолар уһанар киһиэхэ. Кыһаллан, туох баар сатабылбытын ууран туран оҥордубут».

Ытык сиргэ хас биирди киһи кэлэн күүс-уох ылыаҕа, алгыстаныаҕа, ыраастаныаҕа, өйүн-санаатын, этин-сиинин чэбдигирдиэҕэ. Манна киин куорат эрэ олохтоохторо буолбакка, ыалдьыттар бары сылдьар кыахтааныахтара. Дьон-сэргэ бу Ытык сири харыстаан, көрөн-истэн олоруохтара диэн олохтоох дьаһалта эрэнэр.

Евгений Григорьев, Дьокуускай куорат баһылыга: «Кэлэн манна биһи төрүт култуурабытын. Өбүгэлэрбит хайдах олорбуттарын көрөн-үөрэтэн, саҥаны билэн барыахтара диэн эрэнэбин. Кырдьаҕастар этэллэринэн балаҕан наада. Куорат күүһүнэн эһиил холонон көрүөхпүт».

Паарканы өссө кэнэтэн, саҥа тутуулары эбиэхтэрэ. Сырдатыы, кэҥэтии үлэтэ номнуо саҕаламмыта. Инниктин Ытык сир Кыайыы пааркатын кытта бииргэ ситимнэһиэхтээх. Манна оҕо оонньуур уонна спортивнай былассаакката тутуллуоҕа. Дьон сынньанар, күүлэйдиир өссө биир кэрэ көстүүлээх сиринэн буолуоҕа.