Уһук Илин регионнарыгар гектары ылыы бырагыраамата үлэтэ салҕанар

10 сылын сири тыырыы, учаастактары кыранныссалааһын эйгэтигэр үлэлии сылдьар Евгений Федоров кэлиҥҥи кэмҥэ Саха сирин олохтоохторо гектары ылаллара үксээбитин бэлиэтиир. Кини сиринэн дьарыктанар тэрилтэтэ дьоҥҥо учаастактары тыыран биэрэр. Үлэ аныгы олох ирдэбилинэн тутуһуллар.

Евгений Фёдоров, тэрилтэ салайааччыта: «Исписээлинэй оборудобанньалар бааллар - GPS-навигатордар. Олору туруораммыт дьоннорго сирдэрин ыйан көрдөрөн биэрэбит. Элбэх киһи дэриэбинэлэригэр гектар ыланнар туһаҕа таһаарбыттар».

Статистика ону туоһулуур, билигин холобура 21 тыһ. Саха сирин олохтоохторо Уһук Илин региоҥҥа тустаах бырагыраама көмөтүнэн гектардамыттар. Элбэх оҕолоох ийэ Александра Максимова номнуо 6 учаастагы бэйэтигэр уонна дьиэ кэргэнигэр тыырдарбыт. Кини сирдэрин Приморскай кыраайга ылбыт.

Александра Максимова, бырагыраамма кыттыылааҕа: «Билигин кэргэним Уссурийскайга баар учаастакпытыгар суол тарда сылдьар, онно дьиэ тутуохтаах. Дьоннорбор уопсайа 8 сири оформляйдаатым. Манан тохтообоппун».

Чахчы биир киһи дьиэ кэргэнигэр, ол эбэтэр оҕолоругар, төрөппүттэригэр сири баһылаата да, өссө эбии гектар ылыан сөп диэн сир эксперэ Евгений Алексеев чопчулуур. Бу бырагырааманан сир ылбыт киһи хайаан даҕаны ону туһаныахтаах.

Евгений Алексеев, сир эксперэ: «Сири туһаммат буоллахха аннараа өттүттэн дуогабары көтүрүү барар. Оччоҕуна манна босхо сир буолан көстөр».

Онон куорат эркин ылан баҕалаахтар Бүлүүлүүр аартык диэкинэн гектар ылыахтарын сөп. Билигин бу эйгэҕэ уопсайа 50000 сайаапка киирэн турар диэн СӨ баайга-дуолга уонна сир сыһыаныгар министиэристибэтэ иһитиннэрэр.

Ариян Боронов, СӨ баайга-дуолга уонна сир сыһыаныгар министиэристибэтин кылаабынай исписэлииһэ: «Уһук Илин сайдыытын министиэристибэтэ былаан көрдөрүүтүн ыытар. Быйыл 1250 курдук сир бэриллибит буолуохтаах. Былааммытын икки бүк оҥорон сылдьабыт».

Манна даҕатан эттэххэ, Уһук Илин региоҥҥа уонна Арассыыйа Арктикатыгар киирэр уобаластарга эмиэ сир ылыахха сөп.