Саха сиригэр сахарнай диабет ыарыытыттан харыстанар нэдиэлэ саҕаланна

Саха сиригэр диабетынан ыалдьар дьоҥҥо көмөнү оҥоруу "Уһун уонна көхтөөх олох" национальнай бырайыак чэрчитинэн ыытыллар. Бу бырагыраама чэрчитинэн элбэх үлэ ыытыллар. Бастакынан балыыһаҕа саҥа, аныгы кэм ирдэбилигэр эппиэттиир оборудованиянан хааччыйыы буолар.

Бу тэрил киэҥ, дириҥ чинчийиилэри түргэнник оҥорон таһаарар. Маны таһынан түһэриллибит уонна үөрэтиллибит матырыйаал барыта архыыбка хаараллан хаалар. Саҥа үрдүк таһымнаах аппараттар кэлэннэр, быраастар үлэлэрин таһыма үрдээтэ. Күҥҥэ быраас 10-тан тахса киһини көрөн, түмүгү  таһааран, эмтэниини түргэнник аныыр кыахтаах.

Тамара Егорова, офтальмолог: «Диабет буллахпытына харахтарын түгэҕин бу аппараакка көрөбүт. Түмүгүн икки күн иһигэр быһаарабын».

Ыарыыны буларга профилактика үлэтэ эмиэ улаханнык көмөлөһөр. Сырдатыы, сэрэтии үлэтэ тохтоло суох ыытыллар. Маны таһынан балыыһаҕа диабетынан ыалдьар дьоҥҥо анаан оскуола үлэлиир. Манна быраастар хас күн аайы туһааннаах кэпсэтиилэри, көрсүһүүлэри ыыталлар.

Татьяна Душкевич, эндокринолог: «Темаларынан арахсар, атын-атын теманы ырытабыт, кэпсэтэбит. Сахарнай диабет диэн тугун өйдөтө сатыыбыт, астарын көрүнэллэригэр, хайдах сахардарын бэрэбиэркэлииллэригэр, сөпкө инсулин туруоралларыгар».

Саха сиригэр сахарнай диабетынан ыалдьар киһи ахсаана сыллата элбии турар диэн быраастар бэлиэтииллэр. Ыарыы содула олус улахан, ыарыһах сүрэҕэр, тымырдарыгар, сүһүөхтэригэр, харахтарыгар уонна да атын уорганнарыгар дьайар. Харахха, бүөргэ охсор кутталлаах. Күн бүгүн учуокка 33 тыһыынчаттан тахса киһи турар. Статистика көрдөрөрүнэн былырыыҥҥыттан 2 тыһыынча киһинэн элбээбит.

София Семёнова, Өрөспүүбүлүкэтээҕи клиническэй балыыһа эндокринологическай киин салайааччыта: «В поликлиническом подразделении проходят пациенты амбулаторное лечение, также мы ведем диспансерное наблюдение за пациентами с сахарным диабетом. Около 1200 человек раз в квартал у нас проходят диспансерное наблюдение».

Саха сиригэр сахарнай диабет ыарыытыттан харыстанар нэдиэлэ саҕаламмытынан араас хабааннаах тэрээһиннэр ыытыллыахтара. Быраастар аһаҕас кэпсэтиилэргэ, маастар-кылаастарга кыттыыны ылыахтара, нэһилиэнньэни кытта көрсүһүүлэри тэрийиэхтэрэ.