Дьокуускайга XII Евразийскай симпозиум салҕанар

Тымныы курдук айылҕа туохха да тэҥнэммэт күүһүн кыайыыга улахан билим чинчийиилэрэ, арыйыылара ирдэнэр. Төһө да бытархан тымныыларга олох тохтообот, оҥорон таһаарыы туран хаалбат. Бу симпозиумҥа мустан олорор итиэннэ кинилэр иннилэринэ үлэлээбит учуонайдар көмөлөрүнэн. Маныаха анаан туһааннаах институт үйэ аҥаарыттан ордук кэм үрдүк ситиһиилээхтик үлэлээн кэллэ. 

Михаил Лебедев, "Арассыыйа билимин академиятын Сибиирдээҕи салаатын Саха сиринээҕи научнай киинэ" Федеральнай чинчийэр киин генеральнай дириэктэрэ: «Саҥа технологиялары, матырыйааллары туттуохпутун наада. Экономика хайа баҕарар хайысхаларыгар ситиһиилээхтик киириэхтэрин наада».

Симпозиумҥа учуонайдар чинчийиилэри итиэннэ номнуо олоххо туһанылла сылдьар арыйыылары ырытыстылар. Үгүс үлэ тимир суоллары үөрэтиигэ билигин барар. Ол курдук  "Саха сирин тимир суоллара" тэрилтэ туһанар көлүөһэлэрэ киин регионнардааҕар 4 төгүл элбэхтэ алдьаныытын төрүөтүн быһаарбыттар. Итиэннэ маны туоратар сыалтан рельсэҕэ анал киллэһик толкуйдаабыттара сотору кэминэн үлэҕэ туһаныаллыа. Итини сэргэ тимир суол чаастарын бөҕөргөтүүгэ араас хабааннаах үлэ барар.

Иван Дьячковский, СӨ физико-техническэй кыһалҕалары чинчийэр институт сүрүннүүр инженерэ: «Биһиги тыйыс усулуобуйабытыгар тимир суол матырыйаала быдан элбэхтэ алдьанар. Ону хайдах ньыманан бөҕөргөтүөхпүтүн сөбүн үөрэтэбит. Саҥа матырыйааллары арыйабыт, саҥа технологиялары толкуйдуу сатыыбыт».

Институту Николай Черскэй, Владимир Ларионов, Михаил Лебедев курдук бөдөҥ учуонайдар салайбыттара. Кинилэр Саха сиригэр промышленность, оҥорон таһаарыы, энергетика уонна транспорт эйгэтин сайдыытыгар улахан кылааты киллэрбит дьонунан биллэллэр. Оттон билигин кинилэр үлэлэрин эдэр учуонайдар салгыыллар.

Семён Васильев, СӨ физико-техническэй кыһалҕалары чинчийэр институт энергетика кыһалҕаларын салаатын сүрүннүүр инженерэ: «Биһиги тымныы усулуобуйабытыгар ханнык технология саамай элбэх көдьүүстээх буоларын киллэрэ сатыыбыт».

Симпозиум 4 күн устата салҕанан барыа. Манна чаҕылхай арыйыылар итиэннэ чинчийиилэр бэлиэтэниэхтэрэ.