Чараас мууһунан Өлүөнэ өрүһү сатыы туорааччылар элбээтилэр

Социальнай ситим нөҥүө Өлүөнэ өрүс уҥуор сатыы туорааччылар элбээбиттэрэ көстөр. Аллараа Бэстээх-Дьокуускай хайысханан дьон биирдиилээн ким соҕотох, ким аргыстаах көхтөөхтүк мууска тахсан сатыы кытылга туоруур. Онтон Дьокуускай өттүттэн үгэс быһыытынан Хатаһынан хааман саҕалыыллар.

Маныаха ГИМС инспиэктэрдэрэ бу хайысхаҕа сэрэтэр-кэтиир үлэлэрин күүһүртүлэр. Ол курдук сэтинньи бастакы күнүттэн өрөспүүбүлүкэ үрдүнэн ууга сэрэхтээх буолууну тутуһуу ыйынньыга биллэриллиннэ. Ол чэрчитинэн нэһилиэнньэҕэ сэрэтэр-өйдөтөр үлэ ыытыллар. Кангалаас бөһүөлэгин аннынан инспиэктэрдэр рейдэҕэ тахсан муус халыҥын бэрэбиэркэлээтилэр.

Бүгүҥҥү күҥҥэ бу эргин өрүскэ муус халыҥа 30 см тэҥ. Сатыы киһи сылдьарыгар 15 см халыҥнаах муус куттала суох. Ол эрээри билигин өрүс саҥа турар кэмигэр сорох сиринэн муус чараас, тааҥнаах буолуо сөп. Инспиэктэрдэр чуолаан өйдөтүү үлэтин балыксыттарга ыыталлар. Кангалаас бөһүөлэгин олохтооҕо Петр Попов өрүү бу эргин сатыы кэлэн балыктыыр. Балык хабара кэнники сылга мөлтөөтө диэн этэр.

Пётр Попов, Кангалаас бөһүөлэк олохтооҕо: «Өрүспүт мөлтөөбүт, балык суох».

Кангалаас хайысхатынан Суоттуга диэри аэроботтар сырыылара салҕанар. Дьон Илин эҥэр Уус Алдан улууһугар айанныыллар. Бээтинсэттэн саҕалаан айан төлөбүрэ 5 тыһыынчаттан 2500 тыһыынчаҕа диэри түстэ.

Александр Чирков, суудуна капитана: «Нас двое здесь, двое там. По расписанию, три рейса делаем».

Өрөбүл күннэргэ дьон элбэҕиттэн көрөн рейс 4,5 диэри эбиллиэн сөп. Уҥуор туорааччылар кэлиилэрэ көхтөөх. Быйыл Саха сирин үрдүнэн уопсайа 46 муус суола аһыллара күүтүллэр.

Татьяна Степанова, ЫБМ СӨ салалтатын уу эбийиэктэригэр куттал суох буолуутугар салаатын салайааччытын солбуйааччы: «Онтон алтата федеральнай суолталаах, 4 республиканскай, 36 муниципальнай. Бүгүҥҥү күҥҥэ икки муус суола үлэлии турар. Эдьигээн уонна Өлөөн оройуоннарыгар».

Өрүһүнэн суол арылла илигинэ айанныыр булгуччу бобуллар, хармааҥҥа да охсуулаах, олоххо да кутталлаах.