Нэдиэлэ бүтүөр диэри тымныы уҕарыа суоҕа

Өр кэмҥэ харанан көрөн турбут сир күнүнэн маҥхайда. Хаар түһэн суол-иис үлэһиттэригэр түбүктэрэ эбилиннэ. Күннэтэ киин куоракка 60-тан тахса тиэхиньикэ, 40-ча киһи тахсан хаар ыраастааһыныгар төгүрүк суукка устата икки симиэнэнэн үлэлиир.

Гаврил Семёнов, суол тэрилтэтин үлэһитэ: "Күн иһигэр олус элбэх хаар мунньуллан хаалар. Ону ыраастыыбыт, түүҥҥүлэр эмиэ хомуйаллар".

Хаары ыраастааһын бары уулуссаларга, тохтобулларга, уопсастыбаннай сирдэргэ, болуоссаттарга барар. Полигоҥҥа тиэллэр хаар кээмэйэ икки бүк эбилиннэ. 

Александр Павлов, суол тэрилтэтин салайааччытын көмөлөһөөччүтэ: "Ааспыт бээтинсэҕэ 900 кубометр хаар таһыллыбыта, оттон билигин 1800 кубометр буолла". 

Киин куоракка күүтүүлээх хаар түһэн кыһыммыт дьэ дьиҥнээхтии кэлбиккэ дылы буолла. Хаары кытта тымныы тыын тутатына тарҕанна.

 "Сэтинньи сылаас күнүнэн-дьылынан көрсүбүт эбит буоллаҕына, 4-5 чыыһылаттан саҕалаан түүнүн -30 кыраадыска диэри тымныйар. Оттон Өлөөҥҥө -45 кыраадыс бэлиэтэннэ. Маннык күн-дьыл нэдиэлэ бүтүөр диэри турара күүтүллэр. Оттон хаардаан арыый да сымныа ". Татьяна Николаева, корреспондент.

Сэтинньи - Байанай ыйа, саха киһитин саамай сүгрүйэр ыйа.Идэһэ, булт кэмэ.Сэтинньигэ түүмэх, ол эбэтэр кыраһа түһэн барар. Сэтинньи 8 күнүгэр Миитэрэйэпкэ чүмэчи курдук былыттар таҕыстахтарына,  тымныы кыһын буоларын билгэлииллэр. Маныаха урут сэтинньи ый саҥата 40 кыраадыстаах тымныылар түһэллэрэ.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: "Өрөспүүбүлүкэҕэ бу нэдиэлэҕэ ноурмаҕа чугаһыыр күн-дьыл туруоҕа. 7-8 чыыһылаларга хотугулуу-арҕааттан сис былыт кэлэн арҕаа уонна сорох киин оройуоннарга хаардыаҕа, түүҥҥү температура муҥутаан -24 буолуо". 

Онон хаары кытта кэлэр нэдиэлэҕэ кыра сылыйыы кэлэрэ күүтүллэр. Дьокуускай-Аллараа Бэстээх хайысханан айан салгын олбохтоох суудунуларынан салҕанар. Билигин күн ахсын уопсайа 30 кэриҥэ аал айанныыр. Айан төлөбүрэ анараа биэрэккэ тиксэргэ 5 тыһыынча.

Кэнники кэмҥэ күһүммүт уһаан, сымнаан иһэрэ сыл аайы биллэр буолла. Быйыл алтынньы уһуннук сылаастык турда. Кыстык хаар түһүүтэ улуус-улуус аайы араас, быйыл үгүс улуустарга хаар аҕыйах, чараас.