Дьаҥ ыарыыта Дьокуускайга олус элбэх

6 ноября в 13:45 61

"Дьокуускай оскуолаларыгар харантыын биллэриллэн хас биирдии үөрэх тэрилтэтигэр бу курдук уу чуумпу. Көрүөдүөрдэр, кылаастар кураанахтар. Арай кылааска учуутал соҕотоҕун олорон эрэн тэйиччиттэн уруок ыытар. Киирэн чуумпутук көрүөҕүҥ", - Мария Дмитриева, корреспондент

История уруога бара турар. Учуутал Зоя Александрова үөрэнээччилэригэр саҥа теманы кэпсиир. Оттон оҕолор тэйиччиттэн үөрэх анал сыһыарыытыгар холбонон болҕойон истэллэр. Маннык ньыма туһаныллар буолбута быданнаата. Онон учуутал да оҕолор да үөрүйэхтэр. Онлайн дьиҥ уруогу солбуйбата чахчы, ол эрэн үтүө өрүттэрэ үгүс.

Зоя Александрова, Политехническэй лицей история учуутала: "Үөрэхтэн хаалбаттар, саамай сүрүнэ ол буолар. Теманы кэмигэр баран иһэбит. Ыалдьан уруоктан хаалбыт буоллахтарына, уруогу хат эргитэн көрүөхтэрин, ону сэргэ эбии матырыйааллары туһанан үөрэтиэхтэрин сөп".

Харантыын ыарыы биллэ элбээн биллэриллибитэ. Онон балыыһаларга киһи тобус толору. Дьокуускайдааҕы медицинэ киинигэр колл-киин умайан олорор. Ыарыы бүтэһик икки нэдиэлэҕэ өрө турбут. Ол иһин поликлиника иһигэр көрөр уонна дьиэлэринэн сылдьар эбии биэлсэр биригээдэлэрин туруорбуттар. Терапевт, педиатр быраастары тэҥэ суһал кабинеттар көмө буолаллар.

Анна Иванова, Дьокуускайдааҕы медицинэ киинин биэлсэрэ: "Күҥҥэ 50 тахса киһи кэлэн көрдөрүнэн биир көрөөһүҥҥэ. Үрдүк температуралаах, кураанах сөтөллөөх кэлэллэр".

Ити барыта А грипп сибикилэрэ. Ыалдьааччылар үгүстэрэ бу көрүҥ дьаҥынан ыалдьаллар. Бу туһунан эпидемиологическай кэтээн көрүү иһитиннэрэр. Күн бүгүн ыарыы ааспыт нэдиэлэттэн икки төгүл элбээбитэ биэлиэтэнэр. Дьаҥнааччы ахсаана 10 тыһыынчаны куоһарар.

Фатина Федотова, Дьокуускайдааҕы медицинэ киинин эпидемиолог бырааһа: "Өрөспүүбүлүкэбитигэр 10 тыһыынчаттан тахса киһи дьаҥнаабыта бэлиэтэммитэ. Онтон 80% Дьокуускай куоракка. Ыалдьааччылар 70% А грипп вируска сыстыбыттара биллибитэ".

Оттон ыарыы көрдөрүүтэ намтыырыгар, биллэн турар, эрдэттэн сэрэтии үлэтэ ыытыллара көдьүүстээх. Ол курдук, дьаҥнааһын утары быһыыны туруоруу поликлиникаларга ахсынньыга диэри барар.