Саха сиригэр "Чайковскай Фест" тэрээһин үрдүк таһымнаахтык ааста
Дойду сүрүн тыйаатырдарын солистара биир сыанаҕа. Артыыстар Суорун Омоллоон аатынан опера уонна балет тыйаатарын сыанатыгар Саха сирин олохтоохторугар, ыалдьыттарыгар бу күннэр устата "Иоланта", "Евгений Онегин" уонна "Лебединое озера" ипсиктээкиллэри көрдөрдүлэр.
Юрий Баишев, СӨ норуодунай артыыһа: "Операны, классическай акдемическай музыканы таптаан истээччилэргэ, көрөөччүлэргэ сүрдээх интэриэһинэй. Оттон сахалар ити опералары хайдах ылыналларый диэн кинилэргэ эмиэ интэриэһинэй".
Бэстибээл бүтэһик күнүн артыыстар улахан гала-кэнсиэринэн түмүктээтилэр. Тыйаатыр сүрүн солиһа Екатерина Захарова биллэр артыыстары кытта биир сыанаҕа тахсан хас да партияны толордо. Бу күннэр олус түргэнник ааспыттарын, элбэх умнуллубат түгэннэри бэлэхтээбиттэрин үллэстэр.
Екатерина Захарова, Д.К. Сивцев - Суорун Омоллоон аатынан опера уонна балет тыйаатырын сүрүн солиһа: "Операҕа кыттыбытым, Иоланта оруолун толорбутум. Глеб Перязевы кытта биир сыанаҕа сырыттыбыт. Мариинскай тыйаатыр дирижерун Алексей Аслановы кытта үлэлэстибит. Кинилэр олох үрдүк таһымнаах профессионаллар. Онон дуодуйдубут, иэйии ыллыбыт".
Бэстибээл кэмигэр айар талааннаах дьон биир сиргэ түмсэн, алтыһан, биир ситимнээхтик үлэлээтэ. Артыыстар айар көрсүһүүлэргэ кытыннылар, култуура эйгэтигэр үөрэнэр устудьуоннарга маастар-кылаастары ыыттылар, сүбэ-ама биэрдилэр, уопут атастастылар.
Татьяна Павловская, Россия үтүөлээх артыыһа, Мариинскай тыйаатыр солиһа: "Бу бэстибээл тиһигин быспакка ыытыллыан баҕарабын. Икки сылга биирдэ ыытыллара буоллар. Билигин биэс сылга биирдэ буолар. Артыыстар бэйэ бэйэлэрин кытта алтыһалларыгар бэртээхэй тэрээһин".
Бэстибээл бырагыраамата киэҥ хабааннаахтык ааста. Опера уонна балет солистара тэрээһин кэмигэр саха төрүт култууратын, историятын кытта билистилэр. Сорох артыыстар Саха сиригэр бастакытын ыалдьыттаатылар.
Агунда Кулаева, Россия үтүөлээх артыыһа, Улахан тыйаатыр солиһа: "Төрүт үгэстэри, олохтоох култуураны кэрэхсээтим. Бастакыбын Саха сиригэр сылдьабын. Онон барыта интэриэһинэй. Алгыс сиэрэ-туомун чорботон бэлиэтиибин".
"Чайковский Фест" - Улуу композитор Петр Чайковскай төрөөбүтэ 185 үбүлүөйдээх сылыгар ананар. Култуура ускуустубатын эйгэтэ сайдарыгар улахан суолталаах биир улахан тэрээһининэн буолар.