Эт сыаната быйыл хайдаҕый?

Сибиэһэй хаан, харта, сыалаах ойоҕос.Саха маанылаах аһа - бэйэ этэ "Сайсары" ырыынагар саҥа кэлэн эрэр. Биирдиилээн атыыһыт убаһа, ынах, сибиинньэ этин кэчигирэппит. Уҥуохтаах эт, куҥ эт, ис, хаан, харта, туйах, төбө, фарш - эт аһылык араас көрүҥүн харчылаах эрэ буол ылыахха сөп. Светлана Барашкова эти атыылаабыта быданнаата. Бу Илиҥ Эҥээртэн кэлбит сибиэһэй эт диэн этэр.

Светлана Барашкова, атыыһыт: "Таатта ынаҕын уонна сылгытын этэ. Ону сэргэ Чурапчы Бахсытын киэнэ баар".

Быйыл олохтоох ынах этигэр сыана тос курдук үрдээбитэ харахха быраҕыллар. Ынах этин киилэтин 900 солкуобайтан, оттон убаһа этин 1500 солкуобайтан саҕалаан атыылаһыахха сөп. Баҕалаах эти биир үксүн кыралаан, киилэнэн атыылаһар. 

Быйыл сыана лаппа тахсыбтын атыылаһааччылар үллэстэллэр:

"Сылгы этэ олус ыарахан эбит. Ньурбаҕа чэпчэки ээ. Холобур, ис 400 солкуобай, манна 900 солкуобай эбит. Биһиэхэ сылгы этэ 900 солкуобай, манна 1800 солкуобай".

“Сибиинньэ этэ ыллым 800 солкуобай киилэтэ”.

“Марха сибиинньэтин этин ылабын. Сыаната чэпчэкитин талан атыылаһабын. Уонна онтубун хортуосканы кытта буһаран сиибин”.

Ынах, убаһа этэ сыаналаах диэн сибиинньэ этин дьон атыылаһар. Олохтоох сибиинньэ этэ киилэтэ 600 мөһөөхтөн саҕаланар.

Онтон сорох кыстыкка диэн миэстэнэн ыларыгар сыалай миэстэ, буут, ойоҕос эмиэ баар.  Хомсомуол болуоссатыгар киин улуустартан кэлбит идэһэ этин атыылаан эрэллэр. Бу убаһа этэ Хаҥалас улууһуттан кэлбит.

Борис Аммосов, атыыһыт: "Миэстэнэн ылар буоллахтарына киилэтэ 950 солкуобай буолар. Оттон киилэнэн ылар буоллахха 1000 солкуобайтан саҕаланар".

Убаһа хаана 1800-2000 солкуобай, онтон киилэ харта 1500 солкуобай. Сылгы быара эмиэ киилэнэн атыыланар, 5000 солкуобай диэн сыана быһыллыбыт. Киин куорат олохтоохторугар утары ылан сииллэригэр анаан табыгастаах кыра гына кэрчиктээн атыыланар.

Алексей Григорьев, атыыһыт: "Саҥа атыыга таһааран эрэбит. Сыанабыт 400 солкуобайтан саҕалаан". 

Сотору кэминэн өрүһүнэн суол-иис аһылыннаҕына, идэһэ этэ элбээн, атыы өссө дэлэйиэ турдаҕа.