Саха булчут боруода ыттары иитэр питомник кыстыкка киирэргэ бэлэмнэнэр

Саха булчут ытын тэнитии, ууһатыы.  Маҕанныыр аартык 4 км турар "Байанай" булчут ыттары тутар кииҥҥэ кыстыкка киириигэ бэлэмнэнии үгэнэ. Энтузиаст, саха боруода ыттарын тэнитээччи, тустаах киин салайааччыта Юрий Борисов билигин күһүҥҥү булт кэмэ буолан ыттарбытын булчуттарга уларсан үөрэтии да курдук, Байанай мичик гынарыгар көмөлөһөбүт диэн кэпсэтиитин саҕалыыр.

Юрий Борисов, "Байанай" ыты тутар киин салайааччыта: «Куоракка ыта суох олорор дьоннор манна кэлэн биһигиттэн уларсан тииҥҥэ, киискэ бултуохтарын сөп. Ону салгын сии таарыйыа биһигиттэн уларсыахтарын сөп. Маҕан ыттар саха ытыгар эмиэ бааллар. Кини сир харатыгар ыараахтан көстөр. Хаардааха киис көрбөккө чугаһатар».

Билигин манна саха лаайката, илин-сибиир уонна арҕаа-сибиир лаайкалар боруодалара уопсайа 60 ыт кыстыкка киирээри тураллар. Ыттар туруктара этэҥҥэ, күүҥҥэ иккитэ аһыыллар. Сорохтору кэлэн булка илдьэ баран, тыаҕа таһааран, бултуур үөрүйэхтэрин чочуйаллар, эттэрин-сииннэрин чэбдигирдэллэр.

Юрий Борисов, "Байанай" ыты тутар киин салайааччыта: «2017 сыллаахха соҕуруу Кэриэйэҕэ икки ыты клонаабыттара биһиэхэ. Бу тыһы Кэрэчээнэ диэн. Кини Сүүтүк диэн ыт кулгааҕыттан быыкайыык куһуоктан кырыйан ыланнар маннык ыты оҥорон таһаарбыттара. Кинилэр үүт-үкчүлэр. Кэрэчээнэ хаста да төрөөтө, оҕолоро үчүгэй баҕайытык бултуу сылдьаллар».

Саха ытын тэнитиигэ бу биир бэртээхэй эксперимент түмүгэ, клонаммыт ыт оҕолоро эмиэ олус булчуттар диэн Юрий Петрович үөрэ-көтө кэпсиир. Билигин сотору кэминэн "Байанайдарга" маассабай төрөөһүн саҕаланыа. Онно анаан-минээн ыттар төрүүр анал сирдэрин өссө кэҥэтэн, улаатыннаран биэрдилэр. Тутуу олус ичигэс, сырдык, ыраас.

Юрий Борисов, "Байанай" ыты тутар киин салайааччыта: «Билигин бэйдиэ барбыт ыттарга наһаа элбэх харчы көрүллэр. Күүскэ болҕомто уураллар. Биһи хантан да үбүлэммэппит. Бырабыытылыстыба өттүттэн көмө баара буоллар өссө таһаарыылаахтык үлэлиэ этибит».

Байанайдаах саха булчут ыта сайдар кэскилэ, тэнийэр кэмэ уолдьаһар кэмэ тирээтэ.