Олохтоох бэйэ көҕүлээһинин өйүүр судаарыстыбаннай бырагыраама бырайыактары олоххо киллэрэр

46 сыл историялаах, Дьокуускай куорат үгүс көлүөнэ оҕотун сырдыкка, кэрэҕэ уһуйан таһаарбыт "Василек" оҕо саада иитилээччилэригэр кыһамньыта улахан. Олохтоох көҕүлээһиннэри өйүүр судаарыстыбаннай бырагырамаҕа кинилэр бэртээхэй бырайыагы суруйан сайаапкаларын түһэрдилэр. Оҕолор доруобуйаларын бөҕөргөтөр - туус хоһун.

Саина Габышева, "Василёк" оҕо уһуйаанын эмчитэ: «Оскуолаҕа киириэн иннинээҕи саастаах оҕолорго хомойуох иһин элбэхтик тымныйыы, имунитет мөлтөөһүнэ баар. Кинилэр имунитеттара сайдыыта суох буолан бактерияларга, вирустарга ордук хаптараллар. Ол курдук, биһиги тымныыбытыгар муора туустаах салгына олус үчүгэй буолуо этэ».

Чахчы, кылгас сайыннаах, уһун кыһыннаах айылҕалаах дойдубутугар күн уота кылам гынан ааһар. D битэмиин тиийбэт, онтон улаатан эрэр оҕолор доруобуйаларыгар бу саамай наадалаах элэмиэн буолар. Ону өйдөөн тустаах уһуйаан наука тылынан галокамера - туус хоһу арыйары туруорсар. Арыллыы түгэнигэр оҕо саадын иитиллээччилэрэ эрэ буолбакка, бу оройуон оҕолоро эмиэ сылдьыахтара диэн кэллэктиип санаатын үллэстэр, төрөппүттэр эрэнэ кэтэһэллэр.

Надежда Семёнова, төрөппүт: «Төрөппүттэр ааттарыттан маннык олохтоох көҕүлээһин буола турарыттан олус диэн үөрэбит. Туустаах хос биһи оҕолорбут доруобуйаларын бөҕүргэтэргэ наһаа наадалаах».

Василек оҕо уһуйаана киин куорат биир тарбахха баттанар, кырдьаҕас уһуйаана буолар. 1979 сыллаахха манна маҥнайгы бөлөхтөр сылдьан саҕалаабыттара. Күн бүгүн оҕо саада 245 иитиллээччилээх. 1,5 сааһыттан 8 диэри оҕолор сылдьаллар. Логопедическай,  сахалыы тыыннаах бөлөхтөр манна бас-көс миэстэни ылаллар. Оҕону иитиигэ үлэ күргүөмнэҕэ барар.

Айталина Тимофеева, "Василёк" оҕо уһуйаанын сүрүн иитээччитэ: «Уһуйааммыт олохтоох көҕүлээһининэн оҕолорбут доруобуйаларын тупсарарга аналлаах туустаах кабинет туруорсабыт».

Онтон манна даҕатан эттэххэ, олохтоох көҕүлээһиннэри өйүүр бырагыраама Саха сиригэр үлэлээбитэ 8 сылыгар барда. Бу чэрчитинэн нэһилиэнньэни долгутар боппуруостар быһаарылаллар. Ол курдук, кыайбыт нэһилиэк, тэрилтэ судаарыстыбаттан харчы итиэннэ бэйэтэ эмиэ 10-20 быраһыанын төлөһөргө мэктиэлиир.