Өрөспүүбүлүкэ Национальнай библиотеката "Библиомобиль" диэн бырайыагы бэһис сылын олоххо киллэрэр

Библиотекарь Анастасия Александрова бүгүн тиксэриэхтээх кинигэлэрин бэрийэр. Маннык корзиналарга уонна хоппоҕо уонунан кинигэ, сурунаал, хаһыат сааһылаан куорат аадырыстарынан илдьиэҕэ. Национальнай библиотека баай фондун нууччалыы, сахалыы тылынан литературатын ааҕыан баҕалаах аҕыйаҕа суох. 

Анастасия Александрова, СӨ  национальнай библиотекатын библиотиэкэрэ: «Ортотунан күҥҥэ 16 аадырыс буолар. Элбэх соҕуһу илдьэ сатыыбыт, ону бэйэлэрэ талан ылаллар. Аныгыскы сырыыга ылабыт уонна саҥа кинигэлэри илдьэбит».

Библиомобиль, эбэтэр харгыһа суох библиотека диэн бырайыак пандемия кэмигэр киирбитэ. Номнуо 5 сылын библиотека үлэһиттэрэ 65-тэн үөһээ саастаах кырдьаҕастарга, итиэннэ сааһыттан тутулуга суох доруобуйаларыгар хааччахтаах дьоҥҥо сайаапканан дьиэлэригэр кинигэ аҕалан биэрэллэр.

Елизавета Михайлова иккис сылын библиотекаҕа эрийэн кинигэ сакаастыыр. Үйэтин тухары алын сүһүөх кылаас учууталынан үлэлээбит буолан, кинигэтэ суох сатаммат. Урут өрүү библиотекаҕа сылдьар буолар этим, билигин хата аҕалан биэрэллэрэ наһаа үчүгэй диэн этэр. 

Елизавета Михайлова, Дьокуускай олохтооҕо: «Сырыы аайы кэлэллэр, элбэх кинигэни аҕалаллар, талабыт. Классиктары сөбүлээн ааҕабын, нууччалыы да, сахалыы да».

Сайаапкалары библиотека колл-киинигэр үлэ чааһыгар туталлар. Итиэннэ ыйга иккитэ чэппиэр күн аадырыстарынан сылдьан тарҕаталлар. Маныаха сайаапкалары биирдиилээн дьонтон эрэ буолбакка, социальнай, уопсастыбыннай тэрилтэлэртэн, пансионаттартан кытта ылаллар. Холобура бу элбэх өҥөнү толорор кииҥҥэ кинигэ полкатын толороллор. 

Аина Прибылых, СӨ национальнай библиотекатын медиакиинин салайааччы: «Бырайыак кинигэ эрэ таһарга диэн буолбатах. Доруобуйаларыгар хааччахтаах, аҕа саастаах дьоҥҥо биһиги кинилэр олохторун ааҕыынан, култуурунай тэрээһиннэринэн киэргэтэр бырайыак буолар».

2021 сыллахха дойду Президенин гранын сүүйэн, ол үбүнэн кырдьаҕастар дьиэлэригэр араас тэрээһиннэри, куонкурустары ыытан кэллилэр. Ол кэмтэн ыла бырайыак нөҥүө тыһыынчанан киһи хабылынна.  

Клара Туласынова, Дьокуускай олохтооҕо: «2021 сыллаахтан хаһыакка тахсыаҕыттан билбитим. Мин сааһым 80, иннэ гынан таһырдьа мээнэ тахсыбаппын».

Онон тустаах араҥаҕа библиотека чугаһаан, баҕалаах кинигэ ааҕан дуоһуйа иллэн кэмин атаарар.